Torsa na Jompok


Andigan Ho Muli Boru?.

Nantoari botarina i pajumpang ma ahu dohot dongan di sada Lapo Tuak hasomalan, tung pe nian ndang parminum tuak ahu alai sai ni sangahon do nanggo apala sahali saminggu marnonang dohot dongan tu lapo on. Ndang piga dope jolma ro tu lapo ondeng parsahathi, ndang hinata ala toho muse ro udan, olo ma ra ala ni gabe losok roha ni angka dongan mamolus udan  ro tu lapo tuak i, hape somalna molo dung do botari nunga torop jolma hundul minum tuak di lapo i.

Di sada meja tardingkan bagas lapo i nunga adong pigapiga halak ama margitar huhut marende laos paadopadop tuak di bagasan teko na balga di jolo nasida. Di meja na sadana i tardingkan jandela ni lapo i holan sahalak ama do hundul huhut sai maranganangan idaon manatap dompak dalan huli jolo ni lapo i. Sangombas hupanotnoti bohina, eehhh ai ndang ise hape, dongan do hape nasida?

Manigor hudapothon ibana, hupahelleng hundul dompak jolona huhut hugorahon tu parlapo i mangarade tuak laho inumon. Ndada pola dipatangkas parlapo inon sadia laho bahenonna tuak di ahu, ai nunga diantusi ibana molo ahu minum tu lapona i, ndada hea lobi sian dua galas godangna. Jadi nunga diantusi ibana ndada pola surdukhononna tuak na hupangido i di bagasan teko.

“Tuak na imbaru jala na manis i bahen di ahu  lae parlapo” ningku huhut manjalang kedan na di jolongki.

Dijalo ibana tanganki alai hohom so mandok dia ibana, sae do holan engkel supingna dibahen laho manjalang tanganki. Dung i dihandit ibana galasna didorguk tuak na di jolona i sasaotik songon na disirup begeon, udut ni dipeakhon ibana muse galasna i. Dihandit muse teko partambuan na di jolona i, diusehon manambai galasna naung rumar i. Huroha nunga dipangido ibana hian gok sateko tuak tu parlapo i laho inumonna sahalaksa. Dihandit muse galas naung gok ni isina tuak , didorguk nanget sintap ni na suda isi ni galasna i.

“Tambai Lae tuakmi” ninna ibana mulai manghatai dompak ahu, hape so dung dope hudorguk tuak na di galashi.

Ndang pola hualusi hatana i, ai huida nunga mulai marrara pardompahanna na sai manobur tuak i. Hummm na adong ma huroha sipingkiran ni Lae on manang adong na sai solot di rohana, ninna rohangku di bagasan.

“Huida songon na suntol pingkiran ni lae. Tung aha ma nuaeng holso ni roham laeku?” ningku manat mamuhai panghataion tu ibana ai biar rohangku so tung tubu rimasna manang tompu menek rohana ala sungkunsungkunhi.

“Dakdanahon do Lae na hupingkirhon” ninna alai huhut manambai tuak tu galasna i muse.
“Aha be pola mapingkirhu lae tu angka bereniba i, nunga be tammat sude sian singkola jala nunga ture dohot angka karejona. Ai aha dope lae, olat ni do da na mangolu on. Magodang dakdanahi jala boi tolhas binahen singkola na timbo huhut nunga dapotan be karejo” ningku huhut mandorguk saotik tuak na tonggi na hupangido i.

Songon na marhosa ganjang ibana huhut tungki simanjujungna tarhira na mamilangi manang aha ibana manatap galas na di jolonami i. Hupasombu do ndang be mamangkulingi ibana. Hupaida ibana paganjang pingkiranna manang olat ni dia. Nian molo na huantusi tardok naung martua do ibana ala ture sude dakdanakna jala parngoluonna siganup ari pe ndada apala hansit songon ngoluniba on. Tardok tahe boi ma pajoloon lae on molo di hutanami on, sipajoloon di haburjuon, disinadongan dohot di pargellengon.

Leleng sanga hami sai hohom. Domu do muse pargitar na di lambungnami i so margagang gogo ni soarana marende atik pe barlang do begeon soarana so adong domuna tu gitarna i. Alai laos songon i ma tinaon tung pe gabe mingor pinggol umbege nasida sai marende. Olo ma ra tahe ala pangonjar ni tuak i gabe sipata hira naung doshon Trio Amsisi panghilalaan nasida parendeon ni nasida i.

Tompu mangkuling Lae i, songon na manghitir muse soarana begeon ala ni gogona asa habegean panunda ni soara pullang ni parende na di lambungnami i. Alai ala ni pohotna ibana manghatai paula so binege ma soara ni dongan na “perasaan” Trio Lasidos i.

Alai tung songgot do rohangku dung hubege hatana i ala songon na tangis ibana marsarito taringot tu boru panggoaranna na so marhamulian dope sahat tu nuaeng tung pe naung manjonok 35 taon umurna saonari. Sipata hubege songon na mongkit ibana gondongon pataripar holso ni rohana i, gariada ganup tongkin sai mangalsip alogo soarani igungna  songon na mamompom tangisna di bagasan.

Ndang manigor hualusi hatana i, hupasombu ibana muse mandorguk tuakna i. Tung pola hupamanat tahe boha do bohi ni lae i rumangna ala mansai porhot ni saritona. Ueee tahe songon na golap idaon bohina, tarsongon langit naung golap marhobok ala naeng ro udan  pardompahanna  manaon lungun ni rohana di bagasan.

“Hatop adong ni aduna, leleng adong pinaimana” ningku marumpama marpaula laho mangapoi rohana.

Alai tompu huida songon na disampakhon ibana simanjujungna laho manatap dompak ginjang huhut diharat ibana bibirna partoru. Tangkas do huantusi na pasuang iluna do ibana asa unang sanga manetek di jolongku. Bagas do dapot rohangku balga ni holsona ala tangkas do tinanda ibana dohot sude parbereon dakdanak ni nasida, ai mamungka marhasohotan hami na ujui nunga pajonokjonok bagasnami jala sa parmingguan muse do hami.

“Aha be lae roham na ni adu ni nasida dohot na pinaimana. Opat roham Lae dakdanak on nunga sude karejo alai ndang borua ndang baoa laos so adong do nanggo apala sada margira tu dia laho marhasohotan. Alai ala ni berem borungku siangkangan on ma nian bonsir ni i sude laos mangihut so ra marhasohotan  sada pe tinodohonna i” ninna ibana gogo asa tarbege soarana alani soara barlang ni Trio Hau Hau na di lambungnami i.

Lalap hupanotnoti bohina i, naung doshon hajanghajang ni langit na marbirong patudu naung ro udan botari. Songon na golap jala rundut idaon. Mangholom.

Dapot rohangku do parungkilon ni sada natoras naung lobi onom puluh taon umurna songon lae donganku minum on, molo so sada pe gellengna marhasohotan. Ai i do sasintongna hatuaon ni sada jolma molo dung marpahompu ibana, ndada holan ganjang ni parsingkolaan manang godang ni pansamotan ni gellengna.

I ma las ni roha dohot gok ni roha ni sada halak Batak molo dung do titir maranak, titir marboru, marpahompu sian anak parpahompu muse sian boru,  jala nunga sude marhasohotan ianakhonna, on ma ni dok naung martua molo di halak Batak. Ndada adong be sisarihononna molo tung pe matua ibana sian ngoluna on,  dohononna ma ibana naung gabe jala martua ala nunga saur matua be ibana.

Sasintongna, ndada holan ala boi pasingkolahon gelleng gabe boi sude panangkokhon gelleng i jala hasea boi parsinamot na godang si pagok roha dohot sangap ni natoras. Alai ingkon do nian sude marhasohotan ianakhon ni hita Batak ragat ni ngoluna, ai utang bolon do di sada natoras molo adong dope ianakhonna so marhasohotan molo dung marujung ngoluna. 

Molo songon on do adong na so sohot ndada dapotan goar sangap ibana, i ma goar saur matua. Alai lalap do sai goar sari matua sada jolma ia tung pe gok artana, hasea di parngoluon gellengna sude, ganjang pe nang umurna  molo adong dope na so marhasohotan ianakhonna. Lam ma songon lae ondeng so sada dope gellengna sohot.

“Gabe mutu do rohangku Lae. Sipata naeng mandele do ahu marnida dakdanak on. Aha ma lae na hujambari na mangolu on molo matua ahu haduan so simpan sude dakdanak on, ai so hatingkian ngoluon lae. Nda molo bait dia ngoluniba sogot, marujung ngolu iba haduan ndada boi maralaman ahu bahenonmuna jala lalap mate sompong do goarhu tung pe naung ganjang umurhu” ninna ibana.

“Lam ngali do pos ni rohangku na mangoluon lae. Mago panghirimonku ala songon na lam dao do huhilala angka berem on sian ahu, nunga asing be nasida sian ahu. Mandao. Gabe sai sumisi do nasida sude sian ahu molo husoso i asa sohot nasida, tarlumobi ma boru siangkangan on. Songon na agoan do ahu panghilalaanku ngolungkon tu nasida sude, ia dung timbo angka singkolana jala dapotan ampapaga na lomak nasida alai gabe songon jolma na asing nama nasida huida sian ahu natorasna. Nunga muba lae, nunga mimbar parrohaon nasida i, ai holan ngoluna sambing do dipingkirhon nasida ndang olo be mamingkirhon natorasna. Ndang berem si nauju i be nasida nuaeng on” ninna manguduti hatana mansai lungun situtu.

Ndang be hualusi nanggo sangkababa pandohanna i. Hohom sambingnama ahu jala gabe manginongi hatana i manusuk tu pusupusungku, pola tahe tompu naeng perut ilungku ala huingot muse borungku panggoaran na so dung dope martahi muli tung pe naung lobi tolu pulu taon umurna. Gabe huauhon tu diringku hatani lae ondeng, atik tung songon ibana muse ma ahu haduan. Ai ahu pe nunga be holsoan ala so marna marhasohotan boru panggoaranku. Jala songgot tubu biarhu so tung muse do angka tinodohonna on haduan mangihuthon siangkangan on, i ma rohangku.

Gabe huingot tahe hata ni borungku na bulan na salpu uju hutalipon ibana. Ndang hirim rohangku alusanna ahu dohot hata na mansai so boi tarjalo ahu. Ndang tagam rohangku ingkon songon i langgus ni alusna mangalusi sungsungkunki ala husungkun andigan ibana naeng marrumatangga. Dang tarjalo ahu pandohanna na mansai tajom manusuk tu ateatengki ala hujujui ibana asa humatop marhasohotan.

“Molo gabe so etongmu be ahu ahu borum ala so marhamulian dope ahu sahat tu saonari, ndang dia tardok ahu Among, ai so lomo ni rohangku so marhamulian ahu . Pangidoanku tu joloan on unang pola be talipon ahu molo i do laho sungkunon ni Among tu ahu” ninna sulpak manggetgeti ateatengki.

Maniak ateatengki umbege alusna i, lobi sian hansitna na huae tung pinapungu pe sude bernit ni sitaonon na saleleng on manghokhop ibana. Laos hupasombunama ilungki sai maraburan dung hututup talipon i, hupasombu rohangki habang maradu olat ni ida anggiat saep lungun ni rohangki.

“Ueeee, da bagian lapung sibaran lapalapa, boasa ingkon taononku parsorion sisongon on” ninna hata ni ende ni dongan na marende di lambungnami i tompu songon na manginona tu ateate. Hape sian nangkin sai ni halangkon parendeon nasida, dung tompu mandoit hata ni ende i tu iba manigor do naeng ni ihuthon marende papuas holso na di roha i.

Gabe songgot lungun rohangku, pola naneng manetek tahe ilungku.  Nunga naeng hudok nian hatangku mangalusi lae i, alai sai sompol do di bagasan alani ponjot ni rohangku mangauhon parungkilon ni lae ondeng. Marsipanotnotan ma hami nadua, marsipatulut roha nang pingkirannami be marsiboan dalanna manang tu dia mangareapreap so tarboto.

“Ndada simanuk manuk, sibontar andora. Ndada sitodo turpuk siahut lomo ni roha. Tung saguru di Debata ma ngolu on nang angka dakdanahi asa tarungkap nian rohana mamereng natorasna naung mapukpuk manungkehon ibana boi hasea ngoluna. Ianggo hita natoras holan tangiangnama na boi pasahatonta tu Debata, ai tutu nunga marasing hita sian nasida jala nunga dao ambal pamingkirionta nang hadirionta sian nasida” ningku mangapoi ibana nang ahu sandiri.

Dang pola dialusi Lae inon ahu, alai sai mangunduhi ma simanjujungna huhut songon na mengkel suping, alai tangkas do paet idaon parengkelna i. Diulanghon ibana muse mandorguk tuak na di galasna maradu dangir tung mansai ias so teba agia saotik di galasna i. Pardompahanna i pe nunga lam marrara songon gara ni api ala naung mangula tuak i pola naeng mabuk ibana.

“Sude halak mauli bulung da inang, da muba ahu, da muba ahu hahurangan”. Gabe huangkupi hami ma parende na di lambungnami i marende papuas parungkilon na sai gojong manggompang di ateate.

“Borungku andigan dope ho muli?” ningku di bagasan rohangku songon na manungkun boru buha bajungki huhut huapus andorangki.

Panggurit : Tansiswo Siagian.

Medan, 28.09.17

Masukkan email anda untuk berlangganan artikel kami