Torsa Na Jompok


Mulaknama Hami tu Toba.

Manigor las rohangku antong holan hujou taksi sitalpas halinu on (taksi on-line) ala manigor paltak do disi disurathon goar ni supirna dohot arga ni ongkos. Ndang songon taksi na asing i ingkon sipata jolo marjogal dohot rungkung marsielehan arga ni ongkos, manang na asing I so binoto ongkos laho gararon nunga ni nangkohan. Muse sahalion tangkas dipaboa supir ni taksi i, nomor polisina. Huida goar ni supir on  margoar Batak do jala marmarga Batak, apala i ma na mambahen las rohangku.

“Tu Bandara Cengkareng Lae” ningku dung huungkap pintu ni mobil i huhut hatop ahu bongot tu bagasan. Ndang be jolo hupaima alusna manang aha, ala nunga huboto halak hita do ibana.

“Ai halak Batak do hape hamu Amang, hape hujaha nangkin ni surathon di henpon on goarmuna Tansiswo jala so adong margana disurathon. Botul, ndang hea dope hubege goar ni halak hita songon goarmuna on” ninna Ibana huhut mengkel suping.

“I do, marga Siagian do ahu” ningku.

Ndang pola huihuthon panghataionna i, ai sasintongna ahu pe ndang huboto tangkasna boasa gabe bahenon ni damang goarhu i. Boha ma ai so hea sanga sinungkun damang ala tibu do damang marujung ngolu. Alai aha pe ninna tung sai longang pe supir taksi on ala ni goarhi nunga tong las rohangku ala boi ma hami marsirarion saganjang ni dalan sian Jakarta sahat tu Bandara Cengkareng mamolus dalan na lalap so hea so mansat tung pe ninna sian jalan tol.

Jempek hata dohonon, dung sidung hami marsisungkunan marga dohot paboa marga ni na niolinami be, (hasomalan na mansai uli martutur di Bangso Batakta i). Gabe didok ibana ma martulang ibana tu ahu, ala apala laena manang tungganena ninna mangalap boru ni Tuan ni Bangarna.

Dipajojor ibana pardalanan ni ngoluna di Jakarta. Holan dung tammat ibana SMA sian Laguboti huta nasida i nunga manigor mangaranto ibana tu Jakarta. Marragam ulaon naung ni ulana asalma boi dapot parbodarian, sian na martempel ban mangurupi donganna, mangangkat ma muse ibana gabe sitongkar ni bus Metro Mini. Leleng ibana gabe sitongkar ni motor, pasoringsoring supir na ni dongananna.

Sian i ma ibana ngorngor boi muse mambuat SIM, gabe olo ma sipata ibana dilehon supirna manggantihon ibana sasatongkin gabe supir. Dungkon i ndang be holan sitongkar balbal manang kernek balbal ibana, alai nunga sipata gabe supir serap ibana dung tolu taon di Jakarta. Dihamauliatehon ibana do i ala nunga tamba sihumisikna boi di papungu ibana di sitabunianna.

Manaek ma muse ibana gabe “supir batangan” manang supir sada ninna dihitaan, jala dung adong marsadia leleng muse mangoli ma ibana dohot hinaholonganna tong boru sian hitaan sian Laguboti.

Alai marhusor do rumang ni parngoluon on, tarlumobi dung so dipaganjang Gubernur DKI be ijin ni Metro Mini; ndang hinata nian Tulang ai holan angka mobil naung suda gogonama Metro Mini on so hea be manuhor naimbaru; ninna ibana. Ro ma muse Trans Jakarta jala lam denggan ma muse KRL, huhut haruar ma muse angka taksi on-line, gabe so adong be pola piga na olo naek Metro Mini, russur ma muse pandapotan ni supir Metro Mini na gumodang halak hita i.

“Hape dakdanak nunga dua halak jala naeng marsingkolanama satongkinna i. Hape pansarian nuaeng nunga lam posa” ninna ibana huhut pola marporo soarana begeon.

Martua dope tahe ibana ala malo do ni olina puhut jala sesep pahimpu sasaotik sinarina i boi pungu jala boi diihuthon ibana donganna mangkredit mobil laho bahenonna gabe taksi on-line. Nian dimulana i lomos do rohana atik so boi ibana manggarar kredit ni motorna i.
Alai mangasi do Tuhan i, ala so pola piga dope dua taon na salpu na martaksi on-line on tung tabo dope pansarianna sian i, jala boi pola disuguthon inantana sitabunianna songon tabungan nasida dos pe na sasaotik.

“Rohanami nian molo dung boi pungu, asa adong bahenon uang sangkram ni jabu tung pe humolang dumao di pinggir ni Jakarta on” ninna ibana songon na mandele soarana.

Hape ndang manongtong tabo ni pandaraman i songon sian mulana ibana mamboan taksi on-line. Ai ndang hinata ganup ari do martamba taksi on-line, martamba nang goarna, laos mardomu ma angka naung karejo jala adong mobilna tung disangahon muse do botari dohot borngin satongkin gabe taksi online.

“Adong muse ma taksi on-line margoar Lele gabe marsilelean nama mandior panumpang, adong goarna Beta hape panumpang pe nunga sian na asing,  adong margoar  Gerep, so binoto angka na naneg tubu dope ra muse jala laos hatop muse tamba manupiri tu taksi on. Martamba ma muse Trans Jakarta, martmba KRL, martamba nang angka Ojek on-line” ninna songon na patudu pandelean ni rohana.

Leleng hupanotnoti bohi ni ibana, targombar tahe holso dohot parungkilon ni ibana di rumang ni hansit ni na mangaranto tu Ibukota holan marbagahon singkola na paspasan. Boi do hulapati hatana na sipata songon na manderse di partinaonanna dohot parungkilonna di ngoluna.

“Apar pintor holbak do moru pansarian nuaeng on Tulang na mamboan taksi on” ninna ibana manguduti holsona apala porhot hatana i marlogat hamian.

“Jadi bohanama dipingkiri ho nuaeng?” ningku nanget manigati rohana.

Songon na marhosa ganjang ibana huhut manatap dao tu jolo ala toho lumumbang dalan i dung malua hami sian dalan na mansat i. Hape ndang sadia leleng nian na lumumbang i ala nunga mansat muse dalan tol i dingkan jolo muse.

“Nunga dos tahinami dohot berem nang natuatua i sian huta ro di simatuangku tahe, ingkon mulaknami hami tu Laguboti di bulan sada na naeng ro on” ninna ibana huhut manatap tu jolo di dalan na mansat i muse.

Tompu songon na humordit rohangku umbege hatana i, ai ndang tagam rohangku molo songon on na poso dope jala nunga adong mobilna songon dalan ni ngoluna bope na kredit dope gabe martahi mulak tu huta. Muse dakdanak i pe so adong dope naung marsingkola jala so ala torop ni anakhonna lobi sian na dua i. Hape somalna molo jolma na poso dope songon ibana tung bangkol do mulak tu hutana tung boha pe hansit ni parngoluonna di rantona, ai sai adong dope panghirimon ni na umposo marhosing do haduan pandaramanna.

Boha ma tahe sai naeng ingkon “banteng” do di pangarantoan ndang olo benget jala sesep gabe “hambing” na mamopari jala na mokmohon di huta?. Pangago ni ende Anak Medan I ma tahe????.

Alai huida sian tajom ni simalolongna dohot gopas ni holiholi ni hurumna i, jolma na benget do ibana jala na toruk marroha. Boi dohonon tahe on ma tipe ni halak Batak na so uraura mandele hatiha jumpang paet ni parngoluon. Alai aha ma di bagasan rohana nuaeng maringkon mulak ibana tu huta sian Jakarta na balau on?, sai manginongi rohangku mandodo aha na di rohana dohot pingkiranna i. Ai biar rohangku so tung do holan hatahata songon hata pandelean sambing hatana i, hape sasintongna ndada adong rohana mulak ala mabiar muse mangulahi marhansit mulak tu huta ala mulak mandasor.

Tutu mansai leleng hupanotnoti ibana, hupatangkas mulak manganahon bohina i muse. Huida tangkas guratgurat ni bohina dohot suhisuhi ni osangosangna ro di tajom ni simalolongna i. Huserbeng ma muse dohot rantos ni panerbengna, targombar tangkas dokdok ni parsorion naung tinaonna dohot naung somal ibana margala tingko di kota na ribur on.

“Ida ma tulang, ai aut sura ndang mansat dalan tol na margarar on nda sanga dope isarana iba dua halina i tu Bandara on sian Jakarta?. Alai suda ma tingki ala ni mansatna, mago ariari  so sadia na ni omo. Ganup ari hira na mahatophu do do parhosing ni ari on, ai so hinalala nunga marhusor jala guling mataniari hape so sadia dope na ni dapot hepeng boanaon parbodarian tu jabu. Olo ma iba 18 jom sadari saborngin lalap marhalianghaliang asa adong boanon manggarar kredit ni mobil on dohot balanjo ni dakdanak i” ninna ibana gale.

“Sampulu ualu jom sadari saborngin?” tarhatotong ahu umbege hatana i.

“I do tulang. Sipata pukul opat manogot nunga haruar iba sian jabu, jala holan pinangolu “aplikasi taksi”on nunga adong sipata panompang manjou iba. Alai sipata ma pinaima sa jom asa adong pitik tu iba ala ni godang ni taksi on-line on nuaeng. Mulak ma iba sipata pukul sampul manang sampulu sada borngin, hape dakdanak i nunga muse modom. Jadi borhat iba karejo modom dope dakdanak i jala molo mulak iba nunga modom muse dakdanak i. Ueeee ndada hea iba marmeam manang manghatahatai dohot dakdanak i, hansit mansai mansit ma tahe Tulang ai songon na so ditanda dakdak i do ise iba” ninna ibana huhut pananget pardalan ni mobilna i ala laho manggarar ongkos ni dalan tol i.

“Burju ni roham do naeng mulak tu hutamuna?”

“Ianggo sian rohanami ndang adong be sundatna ingkon mulak tu huta do hami. Jala nunga hubuhai mangurus angka surat pindah tu Toba” ninna ibana.

“Marhua ma ho di hutamuna?” ningku mangarisiki.

Dipatorang ibana naung tongon nuaeng dibuka Pamarenta Tobasa dalan sian Balige topet sian Lumban Bulbul manopinopi Tao Toba tombus naeng bahenonna sahat tu Lumban Binanga Laguboti. Ala di Lumban Binanga do huta nasida, adong ma tubu pamingkirionna tung aha pe laho gadisonna tu angka pardalani na ro tu huta nasida i haduan sai na tau langku ma i, asalma minar bohi jala lambok hata tu angka na ro i.

Tung pos situtu do rohana na boi denggan ngoluna dung di hutana, ia tung holan manggadis minuman pe haduan Inantana disi jala ibana huhut mangula tu balian, na tubu ma ngolu ngolu di nasida jala boi denggan ajaranna ianakhonna na dua i.

“Molo pinuhutan do tulang mangula dohot marpinahan bibi dohot manuk rupani jala laos martigatiga rohamu Inanta di topi ni Tao Toba i,a nunga ra dapot mangan iba jala boi pasingkolahonon dakdanak on. Porsea do ahu molo binahen do satongani na mansari di Jakarta on di huta jala ndang olo iba magomago di Lapo tarlumobi marjuji nda ingkon boi do taluhonon pansarian ni na songon iba di Jakarta on tung pe iba tading di huta. Apalagi muse Tulang laho majunama parawisata ni Tao Toba. Molo so saonari be buhaangku andigan be, unang dung maju haduan asa adong roha mulak” ninna ibana patoranghon pos ni rohana dohot panghirimonna i.

“Ai biar ni rohangku na gabe tarihutihut do hamu gabe malas, maos pasuda tingki di Lapo Tuak, lalap marjuji dohot marmeami di huta. Gabe marisuang naung sian Kota hamu ndang mambahen tiruan na denggan tu hutamuna” ningku mangalesengi.

“Dapot rohangku do hatamuna i Tulang. Alai boi do idaonmu tingkosna molo dung mulak ahu, ingkon imbar do ahu sogot sian angka dongan na so margira tudia di huta. Nion nomor taliponku, nunga husimpan nomormi Tulang nangkin. Marsitaliponan pe hita haduan jala boi ma idaonmu tulang atik na holan hata do pandohanki” ninna ibana huhut papinggir mobilna ala naung sahat tu bandara.

“Selamat jalan ma tulang. Bulan sada nunga di Laguboti ahu jala ingkon topotonku do ho tu Bona Pasogitmuna Palipi Kecematan Silaen Tobasa. Boha tabo do tahe tuak disi Tulang?” ninna ibana huhut marsijalangan hami.

“Bah, so dia dope nunga tuak dihatai ho. Ai gabe lomos do ahu di hatami nangkin?”

“Hata gaithu do tulang i. Idama haduan tung so oloanku rajaan ni tuak dohot juji di huta. Ingkon marimbar do ahu sian angka na asing i. Porsea do ahu tu diringku dohot tu hutangki na boi denggan ngolungku jala boi maju dakdaknakhu sian huta pinungka ni Ompungnami i” ninna ibana songon na marpadan huhut marsijalangan hami.

Hummm, toho do nuaeng hatana i? Boi do pasoonna tuak molo di huta?, boi do so tioponna juji? Boi do ndang lalap tingkina mago manghatahatai di huta?. Boi do so suda tingkina marpollung tubu toho adong ulaon pesta. Pesta…marpesta…..so tung lalap holan pesta do rohana haduan molo dung di huta? Alai sai anggiat ma tutu rohana i asa adong tiruan na denggan ibana haduan di hutana Laguboti Tobasa.

Horas ma  Iwan, (samaran), ingkon ro do ahu bulan sada on mandulo ho tu hutam.

Panggurit : Tansiswo Siagian

Bandara, Soetta: 28.09.17.

Masukkan email anda untuk berlangganan artikel kami