Torsa Na Jempek

Sok Kali Kau LOMO?

Nunga lobi saminggu lulululu roha ni si Tianur ala  so hea diida ibana ullop ni si Lomo, hape somalna so hea guling ari ianggo so ro si Lomo tu inganan “indekost” ni si Tianur. Ndang sadia  dao inganan “indekost” ni nasida nadua, holan opat jabu do holangna. Rap kuliah do nadua on di Fakultas Ekonomi USU alai tutu marasing jurusan. Si Lomo Jurusan Akutansi, si Tianur Jurusan Ekonomi Pembangunan.

Huta ni nasida pe ndada pola dao, si Tianur di Laguboti si Lomo sian Silimbat.  Alai ragat SMA nasida si Tianur sian SMA Del Laguboti alai si Lomo sian SMA Negeri Narumonda. Dung pe kuliah nasida asa marsitandaan  uju rap masuk sataon na salpu di USU.  Erget ma tahe hatiha mula marsitandaan nasida ai ndang na marsangajo nasida marsitandaan hatiha i. 

Tingki i dung sidung masa perkenalan di Fakultas, nunga botari,  marudur nasida laho mulak tu ingananna be, alai tompu mangullus alogo mansai gogo pola tahe marhalisungsung jala manonggahi ronggur mardongan sillam.

Marsurak si Tianur, angka hitir ibana ala biarna sai manillami huhut mangkuling ronggur. Marlangannama bohina hatahutan huhut marlojong asa unang haudanan roha ala songgot por udan i. Tuani do adong hatop jumpang nasida panision di Simpang Sumber dalan dompak indekost nasida. Disi ma nasida marsitandaan.

Di mulana i ndang dapot roha ni si Tianur si Lomo, jala ndang adong tubu rohana manang dia. Ndang hitana si Lomo nunga dagingna tanggurniangon, hulinghulingna sisiksisihon, obukna pe harsang laos so hea huroha nanggo apala dibolus apala miak makkan. Na mambahen laos so sir roha ni si Tianur mangida si Lomo, deba ala ni henponna i ma, henpon Nokia na matua na so adong be “diproduksi” nuaeng on, kassana pe nunga lota. Maila nama nian mamangke i. Sandok “barang antik ma”, hape sude jolma nunga mamangke henpon android naung fourgee angka naung “canggih”.

“Annon hu WA pe ho” ninna si Tianur sipata mangalesengi si Lomo molo didok naeng ro ibana marsirarion tu “indekost”na, hape  sian dia ma adong aplikasi WA di henpon Nokia barang antik i

“Unang sai lesengi ahu poang” lambok do si Lomo mangalusi si Tianur.

Alai laos i do hasurungan ni si Lomo, na so olo i ma ibana maila manang songon na mandao sian angka donganna tungpe godang hatadingan ibana di angka hamajuon si nuaeng. Jala na mambahen sai las roha ni angka donganna tarlumobi anakboru tu ibana di humaliang kost nasida i, i ma pargereonna na sai mambahen angka donganna mengkel molo dung do dibuhai ibana mambahen siparengkelon.

Ia tungpe songon i, tung sada anakboru pe tung so adong do na tubu rohana mardongan jonok tu si Lomo, tung si Tianur pe na jotjot  di angkupi si Lomo pasingkop tugas paperna, manang dipasali si Lomo paima sahat tongosan ni si Tianur sian Laguboti tung saotik pe so sir rohana tu si Lomo.

“Barang antik bro” sai hata on ma dohonon ni angka anakboru i molo toho martaringot tu si Lomo. Sandok, tung so adong ma mambahen tubu sihol tahe tu si Lomo lobi sian malona mambahen si parengkelon. Molo i, boi ma. Alai molo gabe hamlet? Amang oi, “sombaku ompung, ampun ndoro” ninna si Tianur tu si Bonur dohot Purnama huhut mengkel margak nasida.

Alai manang alani aha ma, nunga lobi saminggu ndang hea be di ida si Tianur si Lomo di parindekosanna manang di Kampus. Angka dongan nasida pe nunga tong diordior jala sungkunsungkun aha do na masa tu si Lomo so hea haidahan ullopna. Dongan sakostna pe tong so adong umboto tu dia habang si Lomo. Sude tahe nasida lulululu songon na agoan ala so hea tarida nanggo halilu ni si Lomo si “barang antik” i.

Songon i nang si Tianur nunga sipata tompu busisaon, tarlumobi songon on adong tugasna sian Dosen na so niantusan, hape na saleleng on sai hatop do si Lomo mangurupi ibana . Sipata tahe olo do si Tianur “ TB, Terima Bersih” ninna nasida “istilahna”. Tompu songon na agoan si Tianur tu si Lomo si barang antik naung maol haluluan saonari on baoa si songon i. Burjuna, malona, parengkelna, benget ni rohana, basarna manghatai……..alai molo tu sitelan, gaya…..ampun ndoro.

Di sada tingki mardalan si Tianur laho tu kantin fakultas, tompu diida ibana si Lomo haruar sian Kantin manigor mangengkol karetana. Hummm, si Lomo markareta na imbaru tus, rangselna pe bagak, jala pardompahanna nunga marmiak, songon i nang obukna dang harsang be. Diida si Tianur muse sipatuna dohot salauar “jeans” si godang arga dipahe si Lomo.

“Lomoooooo” ninna si Tianur manggora si Lomo.

“Santabi, naeng masuk ahu kuliah” ninna si Lomo langgus mandada si Tianur.

Bok. Mallobok taroktok ni si Tianur. Songon na manolsoli si Tianur dung didapothon ibana donganna di bagas kantin i. Ponjot rohana, diirisi panghilalaanna dung marsarito si Purnama, na di Medan do hape natoras ni si Lomo jala pejabat di Kantor Gubernur.

Na saleleng on di jabu ni Ompungna do ibana sian mulai sorang ala manigor monding inongna laho manubuhon ibana. Sintap ni tammat SMA gariada tahe dung kuliah ibana di USU ndang olo ibana tu jabu ni Natorasna ala Ompungnama dietong ibana amongna dohot inongna. Alai ala sai mangelekelek Amongna dohot Inongna panoroni i na sataon bolon on dung kuliah ibana di Medan, gabe olo ma ibana tading dohot natorasna.

“Amangoi, dosangki” ninna roha ni si Tianur songon na mandele idaon bohina ala panolsolion ni rohana di pambahenanna na saleleng on tu si Lomo.

Alai boasa songon na mamaus jala langgus ho manise ahu Lomo?. Boasa?

“Lomo, sok kali kau!!!” ninna si Tianur lalap manolsoli di rohana.

(Panggurit : Tansiswo Siagian)

Masukkan email anda untuk berlangganan artikel kami