Torsa Na Jempek: Parumaenku Boru JOKJA.


Di sada tingki di Gedong parpestaan manginsugut ma ahu dohot donganku tu suhisuhi ni lapo di pudi ni Gedong i. Nunga dua pulu lima taon hami na so hea pajumpang dung tammat sian singkola STM di Siantar. Alani sihol naung tasihon i  gabe hutait ibana tu duru dung sidung mardaon pogu, tung pe nasida na marhaha anggi si jalo tintin marangkup di ulaon i.

Leleng hami manghatai, marnonang huhut sipata margak. Marsipaboaan parsaripeon dohot taringot pargellengon hami nadua. Ni nonangan ma muse sahat tu angka dongan naung olat ni dia saonari.
“Holan tolu bulan dung hujalo surat tammathi pintor mangoli do ahu, ai nunga sai disosak amongku alani parsahitonna. Nanggo jolo mangoli nian ahu di rohana atik bait dia ngoluna” ninna ibana patorangkon huhut sai margak.

Dang muba kedan on, sian si na uju i. Hot songon na so adong begeon arsakna. Dipaboa ibana muse pitu ianakhonna. Tompu songon na tarhatotong ahu umbege pitu ianakhon. Hape diantusi ibana do longang ni rohangki di hatana i.

“Unang pola longang ho ala pitu gellengku. Diboto ho do holan sampisik ahu do tubu ni natorashu. Jadi na balas dendam do ahu hahahahaaha, jala mangasi Debata, lima anakhu dua borungku. Musengani aha ulaon poang molo di hutanami, mardomu ma dohot ngali ni Sidikalang roham, sipata laos so olo do lingkang iba sian jabu. Hahahah hahaha, marpahaseang tingki ma goarna, unang magopo “ ninna ibana margak apala gogo, pola jolma na di lapo i sibereng dompak hami nadua.

Hupaboa ulaonku, boru aha na huoli, piga dakdanakhu, jala hudok di Medan on do hami tading.  Husaritahon kalas tolu SMP do pe panggoaranku ala tarlambat ahu mangoli ala ni porsuk ni ngolu on.
“Bah porsuk do hape ngolum, alai kunsi ni mobil do dipatioptiop ho sian nangkin, jala mokmokmu pe poang sun do. Amang ngerina i poang porsuk hape ngolum. Ia tu hutanami ma ho, rade do disi sude jala hutekken ma na so porsuk aeonmu. Adong kopi, adong sayur, gok lasiak dohot pisang, adong paremean rarak manuk di pudi, adong muse tobat ni jahir, songon i hundulhundulanmu horbo si opat pat. Holan manuhor siranama ringkot ho tu Onan. Listrik nunga rade, sinyal pe marpesbuk gok. Aha dope??. Tading ringgas ni na mangulahonnama” ninna ibana tong margak gogo.

“Jadi nunga kuliah di dia poang siangkanganmi” ningku mangambal hatangku ala pangalesengina i tu ahu.

Huongkuhon do sude hatana i, muba tahe holso niba na di kota on hira so adong hasoan jala lalap hurangan naeng ihuthonon sude na masa. Halak marmobil naeng dohot iba marmobil hape passarian so sadia lobi holan marbagahon gaji bulanan i. Halak marweek-end naeng dohotan pasudahon na sinari. Nunga dimpos nian bagasniba alai naeng do paubaon muse modelna ala ro model na imbaru. Maup ma hisaphisap ni daging i tahe laos so marnasae jala ndang marhaujungan sai paihutihut hamajuon na so martopi manang di dia sundungna.

“Songon na manginum aek laut na assim do poang na mangolu on, molo dung do sanga ni inum laos so olo do tos uasniba. Songon i do molo paihutihut na masa nuaeng tarlumobi molo nunga taringot hamoraon dohot arta portibi” ninna ibana mandok hatana mangalithon panghataion.

“Ai na sintua do ho?. Hatangki ma jolo alusi taringot tu anak buhabajumi?” ningku unang sai lalap ahu dipodai.

“Ueeee, i ma poang holsongku. Hujujui do nian kuliah di Medan unang apala songon ahu on, hape poang ndang dao tubis sian bonana. Ni sungkehon do ibana alai sai tagi tuat tu toru do rohana. Binahen tu halangulu alai manuntun do tu talaga. Holan dua semester dope ibana kuliah nunga manigor sumurut, aha ma laho dohonon?” ninna ibana songon na lungun rohana.

“Jadi naung karejo do ibana?” ningku nian.

“Ai dinunuti do mangoli jala nunga dua pahompu i, di hutama nasida mangula” ninna ibana gale.

“Boru aha poang parumaenmi?”

“Boru sian Jokja do nian?” ninna ibana mengkel suping.

“Bah, di Medan do kuliah ibana alai dapotan boru Jawa sian Yogyakarta. Hummmm boru ni Sultan ma i ra ate?” ningku margere.

“Ragat kuliah jolo on, sai ganup minggu do on mulak. Mardongandongan ma dohot borua, huroha borngin i mardalani ma nasida,  ala ngali ni hutanami jala landit huroha dalan i gabe tarsulandit ma nasida nadua, "kecelakaan ma". Mamuro ma pamuro poang, anakniba do pinasingkolahon Fakultas Hukum hape sataon dope kuliah alai boru ni halak donganna i do jumolo gabe SH” ninna ibana margak mansai gogo. Tung so muba do tahe pargaitonna sian na uju i rodi saonari.

“Dang dapot rohangku nuaeng hatam on. Boru Jogya sipata nimmu, tarsilandit nasida, borua donganna i gabe SH” ningku maoto.

“Boru JOnoK JAbu do na hudok ndada boru Yogya Jawa an. Kecelakaan ma goarna ala nunga marlangka pilit nasida tarsilandit borngin i bah gabe SH  ma si borua, dang tung so pasauton be roham?” ninna ibana.

“SH aha do ni dokmu” ningku lalap so huantusi.

“SH, Sudah Hamil. I do astuanna. Hahahaha…na maol ma i diantusi ho” ninna margak huhut manait tanganku asa masuk hami tu gedong i.

“ Hahahahaha, tarsilandit ate di golap ni ari dohot boru jonok jabu i, gabe SH ma borua i. Mamoru ma pamuro ai adong marsuan di na so tingkina. Hahahahaha…..laos so muba do pargaitonmi ate?. Patut do lalap poso ho idaon” ningku huhut margak gogo. (Medan,101017)


Panggurit : Tansiswo Siagian.

Masukkan email anda untuk berlangganan artikel kami