HAMPUNG TOGI - MARANGGAP HUHUT MARSIPAPUNGUAN.




Panggurit : Tansiswo Siagian.

Ianggo borngin pamuhai dung sorang anak ni si Togi ndada piga dope jolma ro maranggap lobi sian angka sisolhot ni si Togi dohot si Kartini. Tarlumobi simatua ni si Togi holan dung dibege nasida naung hipas boruna i nunga pintor ro Nai Polin mamboan boras sipir ni tondi dohot mamboan manuk nang bangunbangun laho patupa na ni dugu rohana asa adong allangon ni si Kartini. Diboan muse adong inuman Anggur Sap Bulan laho inumon ni si Kartini. Ninna nasida asa patamba gogo dohot asa doras tarus ni Ina na imbaru hipas sai somal do dilehon anggur, na ni dugu mardongan bangunbangun dohot tuak tangkas tahe.

Songon i nang angka sisolhot na asing nunga ro be marganti soring huhut mamboan silua na suman tu ina na martataring dung hipas. Adong muse do na mamboan kain panjang laho parompa ni si Unsok na imbaru sorang i. Marragam ma tahe bangko naung somal ni ulahon nasida angka na martondong dohot na mardongan sahuta molo toho adong na marharoan bolon songon on. Sai dipatudu nasida do na parsidohot nasida marlas ni roha ala tamba bilangan ni dongan manang tondong nasida.

Dung pe ari paduahon lam rtorop ma angka ama dohot ina ro maranggap tu jabu ni si Togi, tarlumobi angka donganna songon si Jannus, si Sangkap dohot si Monang nunga antar tibu i ro huhut sipsip manangkui kartu asa adong pangkeon nasida laho marmeam markartu di paranggapon i. Si Togi pe nunga mangarade manjangkon angka paranggap i marhite na parade kopi, bubuk tes dohot gula. Ai somal do songon I di huta nasida I, molo dung adong paranggapan sai torop do ro jolma jala sipata marsiharaan nasida didok ma hatana ‘marsikopi lari’ ninna pandokna.

Tung so binoto do boasa molo maranggap dohononna hata lesengna marsikopi lari, olo m ra ala na sopola margarar i molo minum kopi di paranggapan jala dung sidung minum kopi adong ma deba na sumurut sadasada nasida huhut didok hatana “ mulak ma jolo hami ate, mardungodungo hamu. Sai tumibu ma tamba bolon ni posoposo i asa humatop sareaon tu balian”

“Horas. Bolon do si Unsok i ninna hamu?” ninna si Jannus dung bongot ibana tu bagas jabu i.

“Bolon do amang” ninna Ompu Pangadean boru.

Songon ido somalna sungkunsungkun molo imbaru ro dope manang holan sahali dope ibana ro maranggap. Alai molo dung padua halihon manang mangulakhon muse marasing muse ma sungkunsungkunna tmuse.
“Nunga tamba bolon ni si Unsok i?” i ma sungkunsungkuna muse. Jala alusan ni parjabu ma “Nunga be tamba bolonna”

Lam bagas borngin lam torop ma angka jolma ro maranggap tu jabu ni si Togi. Adong ma na marsirarion angka ama dompak labalaba ni jabu angka ina sumolhot ma i dompak tataring jonok podoman ni na marroboroboan i huhut marsirarion. Molo angka ina asing ma sirarion ni, marragam tahe sian taringot marsuan, marbabo, lan na asing na toho jumpangna hata sihatahononna. Na deba angka ama nunga mamungka marmeam kartu, marsipapunguan didok nasida goarna.

“Bahen jolo tu son sambongsambong na metmet i Amani Unsok asa adong tong tonga di jolo nami on” ninna si Jannus huhut mangarahon angka dongan “toe hamu ise do na dohot asa tamulai na manjaha on” ninna si Jannus manguduti hatana.

Dipaharuar si Monang kartu sian sangkuna, dipeakhon ibana di jolona. Hatop marpungu Amani Bilklinton, si Sangkap, si Monang si Jannus dohot Amani Barita marhaliang nasida hundul mambahen songon na mambahen lobuan.

Di na asing adong muse salobuanna i marhaliang huhut paadopadop kartu di jolo nasida. Ribur ma tahe idaon huhut marsirarion nasida. Sasintongna ndada apala tu hepeng juji i ianggo roha nasida alai holan sada dalan do i unang bonosan gabe manigor martahi modom roha nasida di paranggapan i.

“Humatop poang bahen jolo kopi i Amani Unsok” nunga mauas iba, alani do huroha asa manigor mate kartu niba on. Toe ise dison ho ma Taronggal gantihon jolo ahu” ninna si Sangkap ala manigor mate kartuna.

Alai iango Ompu si Barita Amonguda ni si Togi rap dohot Guru Berlin marnonang angka politik do nasida manaringoti na ndang sadia lelengna i be markising hampungnama nasida muse ala nunga dapot tingkina parkisingon hampung di huta nasida i. Gabe sumurut do si Sangkap sian lobuan na markartu i  dompak parnonangon ni natumua i dung olo si Taronggol maningkati ibana markartu. Ai nangkin pe ndada nian pola lomo rohana markartu alai ala hurang ninna dongan gabe dipaksahon si Jannus ma ibana dohot markartu.
“Jadi boha do pandapotmu Ama Tiur taringot tu na markising hampung on satongkinna i nama ingkon pamasaonta di huta on” ninna Guru Berlin tu si Sangkap.

“Tong ma da Hampung nuaeng tapillit ai saperiode dope ibana” ninna si Sangkap.

“Rohangku pe songon i ma nian” ninna Ompu si Barita.

“Ianggo pandapothu asing do sian hamu. Molo boi do ingkon gantion do Hampung nuaeng on, ai so adong huida tamba pambangunan tu huta on, lalap do songon na uju i. Ida hamu ma, nda holan dua ma goronggorong dipature i saleleng na lima taon bolon on” ninna Guru Berlin.

“Ahu pe satolop do dohot hata ni Guru Berlin on. Diorannama na dumenggan laho pilliton Hampung. Jala hubege arbisna songon na so martahi jongjong do Hampung nuaeng on molo tupa parkisingon annon” ninna Amani Pargaulan mangangkupi hata ni Guru Berlin.

“Nunga na denggan i molo so jongjong be ibana. Ia haru jongjong pe i molo adong do na jongjong asing ni ibana porsea do ahu sitau na talo do i. Ai angka jolma on pe nunga so dapot rohana be Hampungta nuaeng.” Ninna Guru Berlin.

“Alai ise ma huroha na olo jongjong jala dumenggan dihilala hamu natuatua ni huta on” ninna si Sangkap mangigil hata sian angka natuatua i.

“I ma na so dapot rohangku. Alai aut sura sai boi nian roha, adong ma nian sian hamu na umposo I olo jongjong pilliton gabe Hampung nunga ra dumenggan unang apala sai angka na somal na saleleng on asal adongna pinillit gabe hampung” ninna Ompu si Barita.

“Nunga ra dumenggan molo jongjong si Jannus on ate, ai ama ni aha do tahe kedan on, antar garang do hu ida on manghatai jala sai tingkostingkos do on manghatai ndang olo margalekgot” ninna Amani Pargaulan.

“Amani Berlian do goar ni i. Ahu pe tumingkos do on pilliton molo olo ibana jongjong” ninna Guru Berlin.

“Boha olo do suraon ibana jongjong?” ninna Ompu si Barita.


>>>>>>>>>>marudut.>>>>>>>>>>>>

Masukkan email anda untuk berlangganan artikel kami