HAMPUNG TOGI - TARHIRIM MANUK PARTUBI







Panggurit : Tansiswo Siagian.

“Boasa ingkon sai manuk partubi na hupahani rohahonommu Ma’e. Na ujui tangan so diunduk ho dope hatangku uju na poso hita, marpaula diharat lipan jari ni patmu mulak marguru ende. Didok hamu holan laho mambuat ijurni manuk i do laho ubat, dijalo ho jambe bolon sian ahu hape laos diluahon hamu jala diseat hamu di jabu parpodomanmuna. Saonari dung saut hita, jala naeng hipas ho ingkon tong manuk jambe partubi, manuk Siam na arga i anahononmu ingkon seatonku” ninna si Togi songon na mardandi soarana begeon.

“Bah, haru horbomi didok ibana laho seaton borngin on ingkon seaton do i unang mago hosa ni na dua on. On holan manuk dope dipaido nunga borat roham” ninna Ompu Pangadean boru.

“Laos so boi do di ida ho ahu mamiaro manuk jambe bolon partubi huroha” ninna si Togi muse.

“Unang piaro manuk jambe partubi sigodang arga” ninna Ompu Pangadean boru.

“Jadi manuk aha nama piaraonku?” ninna si Togi mohop rohana.

“Manuk boruboru piaro asa godang tolorna, jala ndang jaloonku be seatonmu” ninna si Kartini nenget tung pe morongorong ibana.

Gabe laos mengkel margak Ompu Pangadean boru umbege hata ni parumaenna i.

“Toe, humatop ma seathon” ninna Inongna tu si Togi.

Gabe so tarjua si Togi so ingkon mangoloi Inongna dohot ala pangidoan  ni si Kartini ingkon maneat manuk jambe partubi na salelengna on muba holongna mamiaro manuk i. Marningot ripena i na so pintor bulus hipas, jala so tung gabe alani bait dia inantana i. Sasintongna ianggo di bagas roha ni si Togi ndada  ias rohana laho maneat manuk Siam i, alai ingkon saut do borngin i diseat manuk Siam rara sialtong sigodang arga i asa anggiat tulus inantana i marharoan bolon..

Ndang dope masak dilompa si Togi jagal manuk jambe bolon i nunga tarbege ibana soara ni posoposo tangis. Dilojongkon ibana dompak jolo ditadingkon lompalompana i di tataring, dipajonok ibana dompak bilutna tarbege ibana hata ni Bidan i, :Baoa. Songon na marsinggang si Togi martangiang mandok mauliate ni rohana tu Tuhan ala naung hipas ni olina i.

Dang hasuhatan las ni roha ni si Togi songon i nang si Kartini nang dohot Ompu Pangadean ala naung sorang posoposo i. Tarlumobi muse hipas jala tulus do sude langka ni si Kartini dang adong na gabe sipingkiran tung pe nunga pola saborngin nasida paima sorang posoposo i.

“Togi boha do lompalompami, naung masak do?. Boan ma tu son asa jolo mangan Omak ni si Unsok on asa modom nunga tung loja on” ninna Ompu si Pangadean boru.

“Nunga masak be Inong”

“Antong boan ma tuson jagal Jambe Siam sigodang arga i. Hahahaha….atik songon dia godang ni arga ni manukmi muba hatam apala tu manuk. Boha patudos jolo arga ni manuk mi tu pahompungkon dohot Inongna on, ai tarpatudos ho do tahe i?”

Ndang be maralus hata ehet ni Ompu Pangadean ala naung tu pudi si Togi manonduk indahan dohot lompan jagal manuk na sineatna i laho mardaon pogu niolina i. Diboan si Togi tu bilutna, dung i dilehon ibana tu inantana i.

“Dia ma tu son asa ahu manulangkon tu Omak ni Unsok on, nah abing ma jolo anakmon” ninna Bidan i tu si Togi.

Diumma si Togi pardompahan ni ripena i tung lambok huhut songon na manungkap ibana mandahop niolina na gale dope peak di ginjang ni podoman i.

“Mauliate Ma’e, nunga gabe Inong be ho saonari. Mansai las rohangku Inong, hipas ho dohot si Unsokta on. Mangan ma jolo ho ate” ninna si Togi.

“Ndang sogo be roham ala ingkon seatonmu manuk jambe Siam partubi i?.Huhut tadingkon Nai Unsok di hamu ai nunga tong dohot hami male holan mambege jagal manuk jambe bolon i ” ninna Bidan i mangalesengi.

Mengkel suping si Kartini, ditaon ibana unang puas engkel ala hansit dope diae ibana molo naeng mengkel, bernit di pamolusan ni posoposo i. Huhhh bernit ala ni si tontas nambur i si Unsok anak panggoaran i, alai ala ni ergetna  hata ni Bidan i gabe so tartaon si Kartini do so mengekel.

“Olo do huroha Inang Bidan mangallang jagal manuk partubi?” ninna si Kartini huhut mamongkuk indahanna i.

“Sodap ma ra molo si Togi muse do maneat manuk i” ninna Bidan i huhut padimpos angka ulaulana.

“Nah abing ma jolo satongkin si Unsok on, pahundulma asa boi abingonmu. Asa humatop suanton anggianggi ni si Unsok on tu pudi, denggan bahen unang ansung disuanhon ho, huhut laos boan ma sude on tu mual asa tibu annon tantapi” ninna Ompu Pangadean boru.

Dipahundul si Togi, dung i dilehon Bidang i tu abinganna anakna i. Songon na lomos do rohana nian mangabing ala na so hea i dope ibana mangabing posoposo tarlumobi anakna na sandiri. Ndang tahe hasuhatan balga ni roha ni si Togi mangabing anakna i.  Leleng dipanontnoti ibana bohi ni anakna na modom dibungkus lampin ni tuhor nasida sian Siantar.

“Nunga, langkahon ma jolo manuanhon na hudok i. Dung sidung annon asa paune parati na metmet I di tardas asa adong inganan ni Nai Unsok on. Laos pagara ma muse arang i asa bahen tu toruna anggiat gumira las Nai Unsok on dohot si Unsok.” ninna Ompu Pangadean huhut manjalo pahompuna i sian abingan ni si Togi.

“Boasa ingkon di tardas bahenon parumaenmu dohot si Unsok ndang tagonan di bilut on nasida?” ninna si Togi manungkun Inongna i.

“Di tardas ma bahen, asa huhut dohot angka paranggap bodarina i mardungodungo manjaga si Unsok” ninna Ompu Pangadean boru.

Dung torang ari, mulak ma Bidan i dohot donganna na mangurupi hipas si Kartini. Jolo dijeksi Bidan i do si Kartini jala jolo ditingkir ibana niabitan ni si Kartini laho papos rohana naung ndang mahua be si Kartini molo ditadingkon ibana.

“Boha nunga maradi be, ndang sai durus be ate?” ninna Bidan i tu si Kartini.

“Daong be nian” ninna si Kartini nanget.

“Nunga na denggan i, lam hipasnam ho”

“Alai, maol dope ahu mangalehon manarus si Unsok. Muse songon na bangkol do huroha manetek hua ni tarushon” ninna si Kartini.

“Nda nunga tapompa nangkin, pos ma roham laos tu dorasna nama annon hua ni tarusmi molo dipasomal ho patarus si Unsok” ninna Bidan i.

“Boha sai durus do pe sinagkin i panghilalaanmu?”

“Daong be nian “ ninna si Kartini

“Antong ndang mahua be i, lam sehat na ma ho. Modom ma jolo ho mangulon mangalap gogo, ahu mulak majolo asa modom jolo ahu poang. Alai molo dung tangis annon si Unsok uji ma patarushon ibana asa somal ibana nang ho ate?” ninna Bidan i huhut mandingkon si Kartini di bilutna.


>>>>>>>>>>>marudut>>>>>>>>>>>>> 

Masukkan email anda untuk berlangganan artikel kami