HAMPUNG TOGI - NAENG MARHAROAN BOLON SI KARTINI





Panurat : Tansiswo Siagian.

Mamungka sian pukul ualu borngin nunga sai digorahon si Kartini hansit diae ibana, nunga  maos mamulosi siubeonna. Lalap busisaon ibana jala sai hodohan ibana mardomu ma muse tubu lomosna. Mangan pe tahe nangkin uju rap marsipanganon nasida nunga sai sipata manggedati tanggurungna jala huhut sai ditiop ibana siubeonna.

Dihalaputi si Togi do nian manjouhon Bidan na di huta nasida i, alai ala adong ninna marsahit di punsu ni banjar na sadana i di huta i ndang dapot si Togi Bidan i di bagas nasida. Ndang tarpaima si Togi be Bidan i holan tonanama dipasahat tu Amanta ni Bidan jala dipatorang ibana inantana naung mamulosi dihilala siubeonna.

“Humatop pe hudok tu jabumuna” ninna amanta ni Bidan i.

Hape nunga manjonok pukul sia borngin laos so ro dope Bidan i, gabe alani ma Ompu Pangadean boru pe dohot busisaon jala marungutungut tu si Togi. Domu ma muse muba do oing ni si Kartini jala muba dohot orongorongna mambahen lam lomos roha ni nasida sajabu.

“Ia alapi ma jolo ulakhon Bidan i, so tarpatangitangi orongorong ni si Kartini on”

“Jadi boha do bahenonku, nunga sian i ahu nangkin”

“Lojongkon ma muse manjou Bidan i”

Marlojong si Togi maradu so diboto sambanna pola naeng tungkap ibana ala adong samban batu di tongan dalan i. Hape ndang dope satonga dalan mandapothon jabu ni Bidan nunga tong humalaput Bidan i laho tu jabu ni si Togi.

“Pahatop ma Inang. Nunga sai morongorong ibana” ninna si Togi holan jumpang dohot Bidan i.
Songon na marlojong nasida na dua mamolus borngin i mamostang sian tonga ni alaman mandapothon bagas ni si Togi. Dang dipatontu si Togi be na so marsolop ibana ala ni na mangabuk gira hatop mangalapi Bidan i.
“Tu duru ho” ninna Inongna dung sahat Bidan i bongot tu bilut ni si Kartini.

“Atik adong suruon ni Bidan on ahu annon” ninna si Togi.

“Nda boi do goraonna ho annon?. Laos so subang do roham sai di son hape iba dison jala naeng paresoon ni Bidan nama ibana” ninna Ompu Pangadean boru dung di ditait Bidan i mandar pinangke ni si Kartini.

“Unang tadingkon ahu Pa’e, dongani ahu” ninna si Kartini marpangelek soarana tu amantana i.

“Bah nunga maup, unang paoinghu ho poang. Muba huida oingmu hira na so hea iba songon ho i. Pitu halak on ndada hea didongani simatuam ahu laho manubuhun halak on sude” ninna Ompu Pangadean boru.

Ujungna gabe Ompu Pangadean boru do sumurut ala sai maringkon si Kartini ingkon di lambungna amantana i laho hipas ibana.

“Toe ma Namboru, pasombu ma di son si Togi ai leleng dope on so adong dope agia mahua. Tutu nunga naeng jonok tingkina alai leleng dope on so adong do pe dipatudu dalanna naeng humatop sorang posoposo i” ninna Bidan I tu Ompu Pangadean boru.

“Toe alithon ma mandarmi. Hehe ho, padalandalan ma jolo asa humatop adong dalan ni posoposomon sorang. Unang pola sai margeai ho, nunga turpukta borua i ingkon bernit aeonta manubuhon ianakhonta. Ho Amani Paima, bahen jolo susu dohot tolor ni manuk satonga masak tu si Kartini on, asa adong gogona molo dung ungkap dalan ni posoposo i annon.” Ninna Bidan i.

“Boha do Inang, ndang pola ingkon boanon tu ruma sakit ibana? Ai lomos do ahu so tung bait dia ibana annon” ninna si Togi huhut mangapus hodokna na hir ala ni biarna.

“Dang pola tu ruma sakit on, ai sehat do ibana. Denggan do tensina, denggan do ‘jantungna’ jala posoposo i pe nunga tingkos di dalanna, na burju do posoposomon nunga manigor diboto manopot dalanna. Na hudok i ma humatop parade” ninna Bidan i mangintehon naung somal ni adopanna angka ina naeng hipas. Dijeksihon Bidan i si Kartini dohot ubat patamba gogo didok goarna.

Ndang sadia leleng nunga diboan si Togi sian dapur susu samangkuk na bolon dohot tolor satonga masak tu niolina i. Dung diinum si Kartini di togu ibana inantana i tuat sian podomanna diboan ibana tu duru huhut ditogutogu ibana mardalandalan tu jolo tu pudi di bagas jabu nasida i.

Ompu Pangadean boru pe nunga papungu angka mandar, lampin dohot angka haporluan parsorang ni pahompuna i. Ndang adong saotik pe lomos ni rohana tu parumaenna manang mahua, tung pos do rohana denggan sorang pahompuna i jala ndang pola marruma sakit, ala so adong gorak ni dagingna manang aha taringot tu parumaenna i.

“Mulak ma jolo ahu satongkin. Hupahatop pe annon ro. Molo paretongan ni rohangku naung hatop annon pukul sada borngin ungkap sude dalan ni posoposo i, gariada tahe olo do sahat tu tahuak manuk annon on” ninna Bidan i huhut sumurut manadingkon nasida borhat tu jabuna.

Alai ianggo si Kartini nang pe huhut sai mardalandalan ibana tu jolo tu pudi di jabu nasida i, lalap do sai morongorong tarlobi molo songon na humusor posoposona i. Lam leleng lam sai tamba do hansitna diae ibana ala sai mamiu panghilalaan so targombarhon rumangna dihilala ibana.

“Hansit hian Pa’e” ninna si Kartini songon na tangis.

“Jadi, boha do bahenonku Ma’e”

Toho do tutu, nunga pola lobi tonga borngin ndang dope martahi naeng humatop sorang dakdanak i. Ompu Pangadean doli naung mulak sian lapo sian nangkin jala nunga dipapeak tu podomanna gabe dohot do busisaon umbege orongorong ni parumaenna i. Dang tarbegebege ibana lalap sai morongorong parumaenna.

“Atik na adong do hangalan ni parumaen i, manang na adong solot di rohana? Sungkun jolo parumaen, so tung alani do laos so marnahipas nasida” ninna Ompu Pangadean mandok tu Ompu Pangadean boru.

Hape, Ompu Pangadean boru pe tong do nunga busisaon ibana ala nunga manjonok pukul dua manogot dang adong dope tandatanda laho sorang posoposo i, Bidan i pe nunga laos tarpodom sian pukul dua bolas nangkin di ginjang ni karosi di tardas ni jabu i, ibana pe tong nunga busisaon jala nunga ganggu rohana marnida si Kartini na  so marnahipas.

Atik tung toho tahe, husungkun ma jolo parumaen nanget, ninna roha ni Ompu Pangadean huhut manopot si Kartini na peak morongorong di bilutna. Diida ibana muse anakna si Togi laos so tarpodom mandongani parumaenna i.

“Tu duru jolo ho satongkin adong naeng sungkunonku tu parumaenkon” ninna Inongna tu si Togi.

Hatop sumisi si Togi, domu do muse alani naung loja ibana manaon simalolongna na so marnamodom i gabe songon na mangalehon tingki Inongna i tu ibana asa pasoring nasida mandongani si Kartini.

Lambok diunung simatuana i si Kartini huhut sai diapusapus simatuana i simanjujungna. Leleng sai hohom si Kartini diuji ibana marningot aha na sai solot di rohana. Huummmmm, diingot ibana tompu, alai ganggu rohana atik so alani do.

“Dok ma molo adong na nihirim ni roham. Unang mabiar ho tung manang aha pe i jala tung sian ise pe i. Ummarga do poang hosami dohot hosa ni pahompungki. Toe kedan hatahon ma unang ganggu roham” ninna simatuana i mansai lambok.

“Annon muruk anakmu” ninna si Kartini nanget.

Bah, nunga marjea. Na adong do hape hinirim ni parumaenkon sian si Togi??


>>>>>>>>>>marudut>>>>>>>>>>>>

Masukkan email anda untuk berlangganan artikel kami