HAMPUNG TOGI - GABE SAI RIMASON SI KARTINI



Panurat : Tansiswo Siagian.

Dung lam manjonok arina dung gok di bulanna, lam tamba do rimas ni si Kartini. Sipata gabe bonsir soada do uraura ibana rimason jala ritiriti ateatena marnida amantana i. Olo holan ala so manigor disise si Togi ibana dung mulak sian balian amantana i nunga pintor sogo rohana, ala ni olo ma muse mardandi ibana jala sai runtus manghatai tung pe disise ibana lambok. Bohi ni si Kartini pe nunga olo sai murhing jala songon na so hea tiur idaon, nunga andul tahe sian na masaha tagan so mardenggan pamatang ibana.

Gabe olo do sala hundul sala jongjong panghilalaan ni si Togi, lambok sala lam ma antar gogo otik soarana nunga gabe singkam mabarbar i bahenon ni si Kartini dalanna mardandi manang gabe martabuni tu bilut huhut tangis.

Alai na mambahen si Togi sai longang na olo i ma si Kartini mangigil bada tu ibana holan ala ni saotik na hurang toho tu rohana. Molo dung paduadua nasida ndang alang roha ni si Kartini mamungka bada manang manembesi amantana i asa muruk dung i dialo ibana ma i gabe bonsir marbada. Ia tung pe sai hohom isarana si Togi na olo i ma si Kartini sai manaliknalihi ibana asa gabe adong dalan ni si Kartini muruk.

Martua tahe si Togi lam diantusi ibana pangalaho ni niolina i ala sai olo Inongna mangalehon panorangion tu ibana, songon i muse nang Bidan na sai ringgas rot u jabuna mamareso si Kartini dohot mangalehon angka vitamin asa tung hipas jala gok gogo ni si Kartini molo marharoan bolon ibana muse.

“Unang sai paaloalo Inang ni si Paima i, paida ma disi paula so antusi ma sude. Ai molo so bait dia jala dilehon Debata hahipason di ibana hira dang dao ari parsorang ni gellengmon sogot dohot ari hatutubum” ninna si Bidan i tu si Togi.

“Bah i do ate. Molo songon paretonganmuna i tutu naung dao ma hape 10 ari, ari hatutubungku jumolo sian  tuturta na naeng ro on. Pandok ni na malo sa ‘bintang’ do hami haduan hape” ninna si Togi dung dipatorang Bidan i paretongan ari hatutubu ni anak ni si Togi i haduan.

“Molo baoa muse ma tuturta na naeng ro on, ianggo i da olo do hamu sai patuktak haduan molo so malo ho manganju ibana. Hahahaha….” Ninna Bidan i tu si Togi huhut mengkel margak.

Jai, nunga bulus dipalambas si Togi ateatena molo tung pe olo hatop muruk jala sai marungut ungut si Kartini tu ibana.

Si Kartini pe sipata do sai marhusari rohana boasa gabe muba nuaeng ibana sai sogo rohana tu si Togi, hape ndada nian adong na asing pangalaho ni amantana i nang pambahenanna. Alai ala ni aha ma i tung songon na so lomo do roha ni ibana na parpudion marnida amantana i. Na mambahen longang rohana ia tung pe sipata nunga sai hohom si Togi alai sai tembesanna do i asa muruk, jala molo muruk manigor hatop ma si Kartini mamungka bada.

Hape molo laho si Togi tu duru bornginna i mandapothon donganna tu lapo, ndang be, nunga sai digetgeti rohana ala ni siholna hape holan satongkin do amantana i di lapo. Saleleng so ro si Togi sian lapo muba tahe sihol ni rohana, muba holong ni rohana jala panghirimonna pe sai humatop nian haholonganna i mulak sian lapo asa mandongani ibana. Alai, molo dung sahat si Togi tu jabu olo do tompu muse songon na magigi rohana marnida si Togi jala sai tundalanna ma i molo modom.

Nunga mangarade si Togi manomu haroan bolon ni niolina i, nunga dituhor ibana hian angka haporluan tu si asing ni angka lampin, isara ni rusbang manang parati na metmet asa adong podoman ni si Kartini molo dung hipas. Dipillit ibana rusbang na sian hau na denggan, asa boi haduan di toruna i boi bahenonna arang di bagasan sambong na metmet pansusuluan ni ni olina i dohot gellengna i rohana.

“Molo paretonganku ndang sadia lelengna i hipasnama parumaen. Boha do pangaradeonmuna?” ninna Inongna tu si Togi.

“Nunga dituhor hami be Inong lampin dohot pangkean ni posoposo, songon i angka haporluan na asing. Ho ma Inong manuhuni parumaenmu atik tung adong na hurang. Molo ahu do manungkun I, olo uraura sitik ateatena tu ahu” ninna si Togi songon na mangido pangampinon tu Inongna i.

Dang dialusi Inongna i, gariada mengkel suping do Ompu Pangadean boru umbege hata ni anakna i. Dang diampini ibana si Togi alai ndang disalahon ibana parumaenna i. Di bagasan rohana, muba do annon parumaenna i molo dung hipas ibana.

“Na hudok, atik ingkon boanonmu do parumaen tu Rumah Sakit ai so hatingkian nasib olo nang tolap ni Bidan na di huta on mangurupi hipas haduan parumaen” ninna Ompu Pangadean boru.

“Molo hepeng do Inong ndang gabe pangambati i molo ingkon hipas di rumah sakit do parumaenmu” ninna si Togi neang hatana.

“Bah, nunga sega on. So apala hepeng i na husungkun tu ho, holan hepeng do huroha suhatsuhat di roham. Unang dietong roham molo dung raderade hepengmu nunga ture sude, ndada holan hepeng nag ok gabe mambahen uneune ngoluon, roha do dohot pingkiran do na rumingkot parjolo. Boha nunga mangarade roham dohot parumaen?”

“Boha pola huroha pangaradeon tu si, gabe tubu do biarhu pandokmi Inong” ninna si Togi.

“Na parpudion parumaen huida nunga songon na losok dagingna, nunga ingkon ubaonna i. Ingkon lam hibas do ibana molo lam jonok arina naeng hipas” ninna Ompu Pangadean boru.

“Jai songon dia do huroha Inong, patorang jolo tu ahu”

“Huss. Ahu pe annon patorangkon i tu parumaen asa tangkas diboto ibana. Alai molo rohangku nian nunga dipatorang Bidan i tu ibana”

“Songon dia huroha Inong asa dohot iba mangantusi?”

“Ndang ringkot botoonmu i”

“Boasa huroha Inong, asa singkalna”

“Nunga hudok ndang pola”

“Eheee, Inong on”

“Baba ni on, so adong huida adatmu,  ndada sai sude botoonmu. Hahomion hami Ina do i” ninna Ompu Pangadean boru huhut manadingkon si Togi.

Dihao si Togi jambulanna, songon na gatal dihilala ibana ala ni naung leleng i ndang pargonde ibana. Tung so binoto manang sian dia ibana marsiajar ndang olo manggotap obukna i dungkon mardenggan pamatang niolina. Songon i nama ganjang obukna i dipasombu ibana.


>>>>>>>>>marudut>>>>>>>>>>> 

Masukkan email anda untuk berlangganan artikel kami