HAMPUNG TOGI - MARDANDI BOLON SI KARTINI (2)






Panurat : Tansiswo Siagian

“Songon na maol do hubondut poang indahan on, boha ia jouhon ma jolo parumaen i asa rap mangan hita poang amani Paima” ninna Ompu Pangadean doli.

“Akh, paida ma disi among, muba annon ginjang roha ni i”

“Ima tahe, jouhon ma tu bilutmuna an” ninna Inongna muse mandasdas.

“Ginjang annon roha ni parumaenmuna i, dang olo ahu manjou i”

Tompu jongjong Ompu Pangadean boru. Dilangkahon ibana dompak jolo manopot bilut ni parumaenna i. Digora ibana parumaenna i lambok sian duru.

“Beta ma mangan kedan, ai laos losok do roha ni simatuan mangan ala na sai di bilut i ho. Beta ma kedan, marsahit ho annon” ninna Ompu Pangadean lambok.

Alai laos sip do si Kartini, ndang nanggo dialusi ibana hata ni simatuana i. Manang ala ni aha ma mambahen laos mohop ateatena so mangalusi. Hape nian ndada na simatuana i na mambahen sogo ni rohana. Risirisi roha ni si Kartini sai lalap pangapiapion ateatena hinorhon ni na so olo i si Togi manolopi ibana tu Siantar laho manuhor lampin ni anakhonna na naeng sorang jala naeng rohana mangallang mie pangsit di jalan Cipto Siantar.

Sumurut Ompu Pangadean boru, ndang be sai digogo ibana manggora parumaenna i. Dapot rohana do lungun ni roha ni si Kartini jala somal do tahe songon i uraura mardandi molo toho songon parumaenna i so sae langkana, tarlumobi molo urangan buha baju sada Ina.

“Toe ma annon ma ibana mangan, tung mohop dope huroha roha ni ibana. Mangan ma hita jumolo” ninna Ompu Pangadean boru.

Ndang leleng dung sidung marsipanganon nasida, pintor hatop do hehe si Togi. Mansai mohop rohana ala na so olo i niolina i rap mangan nasida hape nunga apala dijouhon Inongna i ibana. Dang tartaon si Togi mohop ni rohana naeng muruk tu ripena i, ala dietong ibana nunga panlobian pangalaho ni Inantana i holan ala so ditolopi ibana giot ni rohana i.

“Boasa laos so olo ho mangan nunga apala dijouhon Inong ho. Aha gabe songon i mohop ni roham tu Inongki laos sude hasogohononmu” ninna si Togi gogo soarana.

Alai ndang ditagam si Togi gabe hehe si Kartini, jongjong ibana toho apala sonson di jolo ni si Togi

“Jadi aha huroha naeng dohononmu? Naeng tinjuonmu ahu, tinju ma molo barani ho. Dietong ho ahu gabe mabiar molo muruk ho? Ndang mabiar ahu tu ho” ninna si Kartini songon na marrara pardompahanna mangalo si Togi.

Tarhatotong si Togi. Ndang dihirim rohana mangalo ripena i tong gogo soarana, gabe mangihut si Togi lam simbor ateatena tubu balga ni rimasna..

“Bah, nunga mangalo ho ate. Ndang diargahon ho ahu hape tungane dolim”

“Ho do na so mangarhahon ahu tunggane borum, ai so holan di ahu na ringkot asa pola hupaido tu Siantar hita manuhor lampin laho tu gellengmon. So laho manuhor abithu ho hupaido tu Siantar” ninna si Kartini tong gogo soarana.

“Nunga malo hape ho mangalo ahu saonari ate”

“Boha huroha?”

“Ingkon hupaltaphon do huroha babami asa sonang roham”

“Pastap ma molo barani do ho. Haru pastap, alai molo barani ho mamastap ahu ingkon mulak ahu tu jabu ni Inongku”

“Mulak pe taho ho molo songon on do pangalahom” ninna si Togi gogo.

Hape tompu ro Ompu Pangadean boru, bongot tu bilut nasida i.

“Ai aha do ulaulamuna on, so maila hamu marbada”

“Unang antoi hami Inong. Nunga beteng parumaenmon mangalo nuaeng. Ingkon saut do paltahohon baba ni on asa sombu rohana” ninna si Togi huhut songon na mangondam si Kartini.

“Bah, Togi. Na mambahen songon dia do roham naeng pastaponmu ibana. Laho ho tu duru an, padao sian on so tung sanga laoan tangan ho tu parumaen on. Pahatop tu duru ho” ninna Ompu Pangadean boru songon na marsurak gogo huhut mangonjarhon si Togi asa sumurut sian bilut i.

“Paloas Inong paloas asa bulus dipastap ibana ahu. Dietong ibana do ahu mabiar” ninna si Kartini alai huhut tangis ibana marabur iluna.

Dipahundul si Kartini di topi ni paratina i huhut sai tangis ala ni lungun ni rohana huhut ala ni ilana marbada ibana di jolo ni simatuana. Dang tarhatahon ibana mohop ni rohana dohot nang ilana, ai tung so diboto ibana do sai lalap songon i mohop ni rohana mangida amantana i. Ndang diantusi ibana boasa gabe sai sogo rohana marnida amantana i sipata holan ala ni saotik. Hape ndada hea nian so unduk ibana tu parhalanguluna i na saleleng on, jala ndada hea barani ibana mandok dia na saleleng on molo pe asing pandapotna tu amantana i. Muba tahe dung nuaeng sai olo ura ritirition ateatena marnida amantana i.

Ndang pola dipaganjang simatuana i hatana tu si Kartini. Holan dung tangis si Kartini manigor sumurut do Ompu Pangadean boru sian bilut i manadingkon parumaenna laho manopot si Togi.

“Toe, paombun roham itonan, unang sai murukmu boanhon. Songon i do molo Ina na so sae langkana , olo tomputompu tubu murukna. Atik na baoa do nuaeng tuturta na naeng ro on. Ahu pe nian sanga do naeng muruk nangkin tu ibana alai tompu huingot uju ahu songon ibana najolo. Hudompon rohangku sai olo murukmuruk tu amongmu molo toho na huboanhon i baoa, i do asa hudok nangkin atik baoa do nuaeng tuturta na naeng ro on. Toe, elek ma ibana. Unang sai marjogal be ho molo ingkon tu Siantar do rohana manuhor haporluanna” ninna Ompu Pangadean boru mangalehon panuturion tu si Togi.

Ala hata ni Inongna i gabe mulak ma roha ni si Togi, gariada tahe gabe tubu panolsolion ni rohana dung diantusi ibana muruk ni niolina I olo do panghorhon ni dakdanak na binoanton ni ripena i. Ndang holan ala roharohana sambing hape mohop ni roha ni si Kartini tu ibana, tarida do sian na saleleng saut nasida mardongansaripe ndada hea sulpak manghuling si Kartini manang olo rimason.

Tung leleng tahe si Togi sai mangalek si Kartini, sipata dihaol sipata diapus ibana simanjujung ni niolina i. Dipatuduhon si Togi panolsolionna huhut lalap sai mangelek burju si Kartini. Ujungna lambok ma roha ni si Kartini huhut tangis ibana manghaol amantana i.

“So tung muruk ho da Pae, ndang huboto manang aha na mangonjar songon i mohop ni ateatengku marnida ho nuaeng” ninna si Kartini huhut sai tangis manghaol si Togi.

“Nunga sae be i, unang sai tangis be ho. Ahu do na hurang mangantusi ho. Ari Jumat botari laho ma hita tu Siantar disi ma hita marborngin di jabu ni Inonguda, ari minggu ma hita mulak” ninna si Togi lambok huhut mangumma pardompahan ni inantana i.

“Leleng ma hita disi?. Gabe so martigatiga be ahu ari Sabtu?” ninna si Kartini marningot tigatigana.

“Sasahali do, toe ma ndang pola dia i. Asa laho jolo hita mardalani, ahu pe nunga sihol rohangku paganggang pat jala asa manonton jolo hita” ninna si Togi.

Tompu dihaol si Kartini si Togi mansai gomos. Nunga mombun be rimasna i marnida hinaholonganna i, nunga be labe rohana jala lambok rohana tu hasudungan ni rohana i.


>>>>>>>>>>marudut>>>>>>>>>>>

Masukkan email anda untuk berlangganan artikel kami