Hampung Togi - Ndang Jongjong be Hampung i




Panggurit : Tansiswo Siagian.

“Aha do udut ni hatami, ia uduti nian” ninna si Pahotan mandok si Jannus.
“Ai tu aha pola patorangon ni Hampungta on taringot panitia. Boha pe nunga patutna ingkon adong panitia bahenon ni Camat molo periode Hampung, ndang i na rumoingkot……” ninna si Jannus manguduti hatana.
“Jai aha do hape?. Ia torushon” ninna Guru Berlin.

“Na rumingkot, jonjong dope Hampungta on manang daong?” ninna si Sangkap.

Hohom sude natorop i, marsiberengan nasida. Ndang adong na barani mandok hatana. Ndang hinata molo taringot tu hadirion ni hampung nasida sitingki on ndada sude marlomo ni roha marnida i. Somal do i molo dung taringot tu hampung sai marbola do roha ni jolma na sahuta, ndada sude marlomo ni roha marnida i jala ndang laho sude marsogo ni roha tung dia pe opangalaho ni i. Alani do godangan hohom do jolma ala so binoto sipata parrohaon ni dongan na di lambung atik so dos taringot tu hampung i gabe bonsir soada na marsahuta marsihosoman.

Tompu hinsat Hampung Jo tulang ni si Kartini, ndang hinata molo dung taringot tu parkisingon ni Hampung sai maniak do ateatena. Gabe taringot ibana parkisingon ni Hampung laho periode paduahon ibana lima taon na salpu.

Ise tutu na so mardisir imbuluna molo diingot paetna diae Hampung Lama uju parkisingon laho tu paduahalihon ibana Hampung. Ai so adong hian harop ni rohana na ingkon talu ibana tu Hampung nuaeng. Nunga hira sude ditiop ibana soara ni jolma jala nunga pola tahe dihatahon ibana holan sipallessem do pamilliton i ianggo na monang ingkon ibana do.

Suang songon i do torop jolma nang tahe Camat nunga pos hian rohana na ingkon Hampung Lama do hot gabe hampung di huta i. Alai balikna do na ro, na so panagaman gabe talu ibana di parkisingon i dung dietong sude petek na adong.

Diboto jolma i ma muse ise do dipudi ni na masa on. Diboto na torop i ma muse ise do na gabe ihutan ni na mamillit Hampung asa gabe talu hampung lama i. Sude tahe holan satongkin do parhusor ni roha ni jolma ndang mamillit Hampung Lama holan dipapungu Ompu Pangadean doli dohot Guru Berlin angka na tumua di huta i. Jala na mambahen hatop muse marhusor di parkisingon i si Jannus, Sangkap, si Monang dohot si Togi ma dua ari parpudi songon silosilo manopoti jolma di huta i sipsip tu jabuna be manang hohom ditopot rodi tu haumana be. i ma pargulingna gabe tarpilllit Hampung nuaeng na so dihirim jolma hian gabe monang.

Leleng nasida na sai hohom tung pe naung morot tu duru Hampung Lama i. Sai marhusari di rohana be na masa na uju i. Gabe tubu pangaranapion tu jolo aha ma muse na masa molo dapot parkisingon ni Hampung na imbaru. Ai diparhatutu nasida do nuaeng on molo hatiha jumpang mamillit hampung ndang songon na uju i be ala nunga gabe alani parkisingon hampung olo marbahir roha dohot pingkiran ni na marsahuta. Ndada songon na uju i be molo pajongjong naeng hampung sesep do i ndada pola gabe maos i hataan ni jolma ganup tingki dohot inganan.

Alai ala parhusor ni tingki manang jaman, nunga gabe sada harajaon hahampungon. Nunga muse godang hepeng ni Negara pangkeonna gabe sipata lupa ibana ndada hepengna i alai hepeng ni Negara do laho pature huta. Olo ma marrara matana marnida hepeng, lupa ibana so hepengna i gabe dituhorhon ibana laho manmbai sinamotna. Gabe pangumpolanna rohana hepeng na pinatuat ni pamarenta i laho pangkeonna hian pature huta dohot pangisina i.

“Boha do hatangki nangkin Hampungnami, ndang adong labana sai hataan parkisingon, panitia dohot Surat ni Camat molo so adong alus sian hamu” ninna si Jannus songon na mamantom tigor tu Hampung i.

Nian nunga tibu di roha ni Hampung i ndada naeng jongjong be ibana tu paduahalihon. Nunga tagonan marhosing rohana Hampung sian tanganna ala dietong ibana nunga hurang tolap gogona jala ndang tarihutihuthon ibana be na masa di Negara si nuaeng. Ai ndang tagam hian rohana molo gabe hampung ibana gabe mambahen gok sipingkiranna na so patutna sipingkirannna. Sipata dirimangi ibana dokdok ni ni aena pangalaho ni angka Camat dohot na asing na sipata mambahen ibana songon hitehite sideonna laho mambuat hepeng pamora dirina.

“Nunga nian huparungkilhon on na sataon on. Alai ndada na pajolojolo hu ahu mandok hatangku tung pe di paranggapan on. Molo adong nian na dumenggan laho maningkati ahu tarlobi ma muse na umposo, nunga ias rohangku laho mansohot. Holan sajuraponnama ahu hampung” ninna Hampung i mangalusi.

“Songon ma natuatua na tingkos. Las rohangku mambege jala gok rohangku dipangidoanna dohot ias ni rohana i asa adong na umposo nian maningkati ibana gabe hampung” ninna Guru Berlin mangalusi hata ni Hampung i.

“Ahu pe balga situtu do rohangku tu Hampungta on. Molo dung do didok hamu songon i na denggan ma i. Pos rohamu adong do i sogot maningkati hamu na umposo jala na dumenggan laho hampung songon partogi di hutanta on. Ahu ma tusi laho mangaririt. Pos rohamuna sude” ninna si Jannus tullom.


>>>>>>>>marudut>>>>>>>>>>

Masukkan email anda untuk berlangganan artikel kami