HAMPUNG TOGI - MARDANDI BOLON SI KARTINI



Panurat: Tansiswo Siagian.

Manang ala ni aha ma maol si Togi mangundukhon pangidoan ni si Kartini gabe tubu dandina tu amantana i. Ndada nian pangidoan na balga pinangido ni si Kartini manang pangidoan na holan hagigiotna sambing. Alai apala na sai tubu do tu rohana naeng tu Siantar nian ibana naeng mangallang mie pangsit tu jalan Cipto huhut manuhor angka lampin dohot ampot tu Pajak Horas laho manomu marharoan bolon ibana.

“Di Onan Sirpang Tolu ma tuhor boasa pola ingkon tu Siantar, di sip e adong do Sina sigadis mie pangsit. Muse ise lola manaruhon ho tu Siantar jala ho pe nunga maol mardalan” ninna si Togi langgus mangalusi si Kartini.

“Na mansai lomo do rohangku tu Siantar Pa’e, ia dongan ni ma jolo ahu” ninna si Kartini mangelek.

“Dang adong tingkiku, nunga di Sirpang Tolu ma tuhor”

“Jai dang olo ho mamboan ahu tu Siantar?”

“Nunga hu dok ndang adong tingkiku” ninna si Togi gogo soarana.

Dang dia be tardok si Kartini, bulusnama monggop ibana di bilutna huhut maraburan iluna. Dang tagam rohana manjua si Togi hape dung saut nasida holan sahali dope si Kartini diboan si Togi mardalani tu Siantar i pe tagan so mardenggan pamatang dope ibana.

Tung menek roha ni si Kartini ala na so olo i si Togi mandongani ibana tu Siantar, gariada tahe sai ingkon tu Onan Sirpang Tolu do diarahan amantana i ibana manuhor ampot dohot angka lampin manomu anak buha bajuna i. Ianggo roha ni ibana ingkon tuhoronna do pahean na umbagak jala na dumenggan manomu buha bajuna i, ala balga ni rohana. Hape so ala sibahenon ni nasida na so ada, alai tung so diboto ibana do boasa sai manjua amantana i tu Siantar. Gabe alani sai sungkunsungkun roha ni si Kartini huhut tubu menek ni rohana.

Botari i dung laho mardaon pogu nasida dang dipatontu si Kartini be laho manonduk indahan gariada tahe laos so duru do ibana sian bilutna. Tung mansai sogo rohana marnida amantana i, dang rohana laho marnida bohi ni parhalanguluna i ala ni mohop ni rohana.

Nunga maos digora simatuana boru ibana asa rap marsipanganon nasida songon na somal, alai tong do paula so dibege ibana soara ni simatuana. Bulusnama sai sip ibana di bilutna i huhut dipapodom ibana marpaula marsahit.

“Na boha do parumaen laos so mangalusi Inongmon poang, na marsahit do nasida?” ninna Ompu Pangadean doli.

Hohom si Togi, ai ibana pe so diboto ahan bonsirna sai hohom niolina i sian na sogot tu ibana.

“Kartini…Kartini, ia haruar ma ho sian bilutmi asa mardaon pogu hita kedan” ninna simatuana boru.
Tong sai manghohom si Kartini.

“Ai na aha do nuaeng. Idahon ma jolo Ompu Pangadean tu bilutna i atik tung mahua parumaen” ninna Ompu Pangadean doli tubu busisana.

“Ahu pe mangida” ninna si Togi.

Alai tong do laos so humordit si Kartini baliksa laos ditait ibana do gobarna manutupi bohina unang diida ibana amantana i. Tung gotgot do hansit ni rohana marnida amantana na so olo manolopi pangidoanna i, dang tarjalo rohana panjua ni si Togi.

“Beta ma asa rap mardaon pogu hita Ma’e”

Hohom sambing si Kartini.

Disiksikhon si Togi gobar ni si Kartini.

“Mangan ma jolo hita” lambok mangelek si Togi.

“Dang mangan ahu” ninna si Kartini sulpak hatana.

“Na mardandi do ho ala na so olo i ahu tu Siantar?”

“Dang adong mardandi ahu”

“Jai, boasa so olo ho mangan”

“Sogo rohangku marnida ho”

“Molo so olo ho mangan nunga pe taho, lomom ma disi”.

Ditopot si Togi natorasna tu dapur naung hundul di ginjang ni rere parmanganan, alai laos so nanggo diparade nasida do apala pinggan laho inganan ni indahan nasida lalap paimahon si Togi dohot si Kartini.

“Na marsahit do parumaen?. Manang na marbada hamu? So hea parumaen songon i” ninna Ompu Pangadean doli songon na mangandorsup si Togi.

“Mardandi” ninna si Togi jompok.

“Aha dandina pola songon i so olo mangan” ninna Inongna manungkun.

“Pasombu ma Inong songon i, ai sai maringkon tu Siantar ninna laho manuhor lampin dohot abit ni posoposo, hape nunga hu dok asa di Onan Sirpang Tolu ma di tuhor”

“Atik adong na laho tuhoranna na asing jala dang adong di Sirpang Tolu?” ninna Inongna.

“Mangallang mie pangsit ninna di Jalan Cipto” ninna si Togi songon na manihai niolina i.

“Ai adong do huroha mie pangsit Jalan Cipto Siantar di Onan Sirpang Tolu poang asa tu si dohononmu parumaen mangallang mie pangsit?” ninna Ompu Pangadean doli.

“I ma hamu, maampin hu do hamu tu parumaenmuna i. Gabe ginjang roha ni ala ni hamu”

“Mangampini boha do nimmu, na manungkun do iba tu ho alai asing hatam”

“Mangampini ma da, marhua do goar ni i?”

“Toe poang lomom ma ai ripem do i. Alai molo tarsubut ditahataha ni manukmu ma ho haduan parsorang ni gellengmi marsapata tu ho ma poang”

Longang si Togi dang dapot diantusi ibana pandok ni Amongna i.

“Molo laho sorang ma haduan pahompu i, sai lalap so tulus sorang, jala didok parumaen ingkon jolo mangallang mie pangsit Jalan Cipto Siantar nasida asa tulus daknahi sorang. Sadia ila ma ho poang disi. Alai toe ma sai unang ma gabe hangalan ni nasida i. Lomomma di roham. Sonduk ma Ompu Pangadean indahan Iiasa mardaon pogu hita nunga male siubeon” ninna OmpunPangadean doli.

“Tung so huboto do roham Togi, ma betenghu do etongetongmu dohot halihalim. Apala mangido parumaen asa di Siantar manuhor na ringkot tu gellengmu haduan dohot naeng mangallang mie pangsit marmaol ho. Ia orui holit mi Itonan, ai gabe songon sigotil monis do ho huida siholit mangging nuaeng lam martamba usaham. Laho tu dia do sinarimi molo dang laho tu gellengmu dohot inantam, so ala na so adong bahenonmu?, jala muse so holan ho na mansari dohot do ibana” ninna Inongna sai marungutungut huhut manonduk indahan.

“Alai rohamma tahe, dohonon hata tu ho dohononmu do hami na mangampini parumaen dohot na pajingjing ibana. Na so binege ni parumaen do hata on, balga ma nian roham ala burju jala dang pangallang parumaen,dang sai ingkon marpahean na bagak rohana. Serep do huida ibana tung pe gok ditiop ibana hepeng” ninna Inongna I huhut sai manonduhi lompan dohot ingkau.

>>>>>>>>>marudut>>>>>>>>>>>>

Masukkan email anda untuk berlangganan artikel kami