UNANG ALANG ROHAM




Panurat: Tansiswo Siagian
Songon amporik sisada habong na habang marpalapala, tudos tu si do ahu na tarpunjung
mangalaosi ombun manungkus bernit ni sitaonon na so marhaujungan
Songon ende ni sipahut di holom marimpotimpot do ahu marsadasada bulung manjururi borngin na holom

Songon sidumadang ari na holip do ahu, tompu mangholom manginsugut maila soada so marsumangot mandaoni roha na bonsa disaput ni na dangol
Songon bulung na maheu do ahu, hirtang mahiang so ombun adong palabehon, songon na agoan hosa do ahu sai tungki manuhuk porsuk ni bagian

Oh ho tondingku ....
parbagian na tandi na so maulibulung do ahu,
so margogo padirgak simanjujung na tungki,
ia ambalhon dokdok ni na bernit di abarangkon,
asa rap mengkel hita
marsitoguan

Oh...tondingku
gohi roha naung harsang uasan di holong,
unang paadar holan bagabaga mangela panghirimon naung maheu

Oh...tondingku
jomputhon si pir ni tondi tu simanjujung naung leleng martutungkian,
asa dirgak
hehe sumangot
patubu pos ni roha

Oh...tondingku
di dia ho nuaeng?
Unang tadingkon ahu.

Medan, 17/08/17

Masukkan email anda untuk berlangganan artikel kami