ILU NI TANO TOBA



Penulis : Tansiswo Siagian

Huis huis ni anak ni Lali, 

nungnga suman tu tangis ni namali-ali.
Ilu ni dorbia di harangan ni Toba, 

di tombak naung so potpot i,
sai marabur so mansadi.
Ganup ari si solhotna, haha anggina, 

natorasna so dapot pandaraman, 
sipata bungkas sian huta hatubuanna, 
soada be sipanganon soada hadameon, 
marujung ngolu, mate boti  mangeahi punu

Idama dolok ni Toba 

naung salansapon so marjambulan, 
maringgang tartutung si dumadang ari na mangilas, 
nunga dipaluhut hau sian tombak ni Toba laho bahen harotas, 
dipaluhut jolma na so tinanda . 
Tailihon, bohi ni Pangintubu ni Tano Toba na sai bensut, 
tarilu-ilu ala ni siadopanna Tano Toba 
naung marsingkor didadang masa arian, 
ngalian manghitir di bornginna lalap songon na marun 

Tangihonma Pangintubu ni Tano Toba 

na sai tumatangis. 
ngilngilan tumaon mohop ni ari, 
soada hau parlinggomanna, 
so marhasoan be ngoluna sai busisaon 
nungnga mansadi urat ni hau manetekhon aek 

tu binanga paridianna, 
gabe marsik ro di taona, 
nunga sumalim mohopna
 songon na hona tutung ni api. 
Nunga mago be na lambok i, 
lintun ro di didia panorus ni aekna, habang……..

Nungnga maila Ina Pangintubu ni Tano Toba 

marsampur tu si adopanna, 
arian dinolnol mataniari mansai nalnal, 

borngin dipanotnoti bulan, 
soada hulambu bulung ni hau manutupi parsaoran nasida.
Soada be manghungkupi, soada mangholipi, 

patar nungnga bungbung, 
nunga songon na marsaimara. 

Boha ma tarbahen nasida marsampur 

anggiat denggan pamatang ni Pangintubu ni Tano Toba, 
asa manubuhon angka duhut, hau, dorbia, dengke, 
maningkati naung tinangko ni deba, 
asa manubuhun tunas na imbaru palinggom tano toba 
Ai soada be tano na so talak jala holip, 
ai nungnga di tanggali hamu hulambuna i, 
nungnga di butbut hamu jambulanna, 
gabe salang marsaimara 
so sada sengka be manaputi dagingna. 

Idama nungnga mandao Pangintubu ni Tano Toba 

marsirang sian siadopanna, 
Idama Pangintubu ni Tano Toba 
nunga sining so manubuhon manang aha, 
Idama Pangintubu ni Tano Toba 
nunga gabe tungil, punu so martunas si ubeonna.


Balige, 170715.

Masukkan email anda untuk berlangganan artikel kami