HO NA PATUBU HOLONG




mamolus dalan na longong do ahu na sai laon,
marhitehite bulu pataripar dalan
di gonting ni dolok na rahis mansai tungkis,
so sanggullus tahe alogo tarhiap sian topi tao

songon natarbura do ahu marsiadopan
martimpul mohop ni uap na mamolus saganjang ni tingki,
tung pe gabean maranak marboru,
alai,
langit di langitan manongoshon timpul na marsima do,
parsorop ni ombun na mamirong do
pardalan ni ngolungku,
mangullus sian andora ni
parsonduk bolon na so hanamburan rohana mambahen na lambok,
gabe hersut engkelhi
melus so rumata,
songon bulung rata na mahirtang di parhorsihan,
marurus tarboan alogo
tu adaran ramba na mahiang.

hape
tompu ho mamolus
di siulubalang ari na so tarpatudos,
mardalan ho manombis ateate na marsalaon,
mamboan pangkirimon
dauk labe tu pusupusu,
ro ho mandaoni bilang naung leleng mahiang,
songon pandaoni bolon na lambok malilung

ueee siboru nauli
panghilapmi manggora sian na dao,
manjou ahu solhot tu ho,
pos roham manontong do ahu mangalambohi na mohop pademakhon na busisaon di roham, nimmu marhusip sian alogo ni topi tao na bidang?


ueee boru hasiholan
panghirapmi so tarpasiding patubu tumbur rata parlinggoman ni na maliali sangkibung,
rap marlinggom ma hita marsitiopan

ueee da boru nauli
na songgop tu bona na tarpunjung
bulus ni rohami patubu panghirimon di nauasan?

Oh pinarsinta ni roha na tompu padirgak simanjujung na songgot pasihar panaili
pahibul holongmi tu ahu parsibaran na so tarjua.
manontong nian ias ni roham tu parsitarupon naung mamontar
tung pe ho boru nauli na so halojaan dope leakna?

Ohh ho na tompu
pabornok dolok natungil
manongtong ho
siboan parsaulian
sada hita songon daion aek
hot diihot holong na bulus marsitiopan

gomos otan ahu
asa momos ho huihot
sada hita di roha ndang mardua di holong
marsitopan hita mardalan tu jolo
tung so muba
hot marsipalilungan
ro di haduan mareak urmun ari hot hita marsitiopan

tiop ahu gomos hasian
asa hudahop ho
di bagas holong na polin.
Ai huboto do ias roham
mangusehon himpal
holongmi tu ahu, so marimbar songon bulus ni holongki tu ho

Panurat: Tansiswo Siagian

Masukkan email anda untuk berlangganan artikel kami