HINAHOLONGAN



Panurat: Tansiswo Siagian

sian punsu ni dolok
bona pasogit ni daompung,
sian atas ni tambak na pir udean ni damang dohot daompung
hutatap uli ni Tao na tio

sian halungunonki
sian ilu na manetek
huanggukkon dangolhi
ahu anak sangkibung na maliali
hu andungkon lungunki
ahu sisampisik sisada simardung songon tandiang na hapuloan
martutungkian sasada ahu marsaongsaong na parir

hutangishon bernit ni parsaorionki
na sai tumatangis pangago ni sibaran na so tarpasiding i,
alani bagian lapung na so tarhaishon i

hutompashon lungunki, sian luhut na bernit hutaon di siulubalang ari,
lalap so marhosing,
lalap so paimbar hansit sitaononki.

huapus ilungku na marabur dohot tanggurung ni tanganki
huhut manatap tao na uli
hutariashon hirim ni rohangki paima ari binsar

Hasian, tartait ho do ulaning baoadi sian na bernit na lungun on?
Hasian, holan bagabaga do ulaning holongmi mandok manghaholongi ahu ro di ujung ni ngolum?
Haholongan, hot do suraon holongmi tu sibaoa na pinalepale ni na hansit
na so gatudosan i
Hasudungan, nda tung naung sumolsol ho nuaeng dung adar di jolom porsuk ni ahu na so tumanda amana on.
Hasian,  nda naung manolsoli do ho alani hapogosonki......?.
Haholingan.....ia tiop hot tanganhon asa unang mandele ahu tondingku

Toba, 06/08/17

Masukkan email anda untuk berlangganan artikel kami