HAMPUNG TOGI - DITAMUE SI TOGI LAENA DOHOT SIMATUANA



Panurat: Tansiswo Siagian.

Rap do Amani Polin dohot anakna i mulak sian Jakarta dung sidung wisuda ni si Polin, dang hinata tahe nunga lima taon so dung hea mulak si Polin tu huta nasida i dungkon kuliah ibana di Jakarta. Dung partammatna on pe hea ibana mulak tu huta hatubuanna i, suang songon i nang anggina si Pahotan nunga tong lobi tolu taon i dang hea mulak dung kuliah ibana di Palembang. Holan ongkosna pe tutu mulak tu huta nasida nunga boi balonjana saotikna dua bulan, tarhilala unang gabe maporsanhu aeon ni natorasna.

Ala ni i do asa tingki parsaut ni Ibotona i ndang diadopi si Polin alani parhepengon na sompit ma i, hape nian holan si Kartini do ibotoni nasida na opat. Si Polin, Pahotan di ginjang ni si Kartini do dung i pe asa si Manarsar jala siampudan ma si Saurlin tubu ni natorasna. Hinorhon ni na so boi i ro si Polin mangadopi parsaut nasida tung apala ringkot roha ni si Togi naeng manamuae laena i huhut marsirarion nasida.

“Laos gogohon ma asa dohot simatuam duansa. Muse dungkon saut hamu dang hea dope rap  marasipanganon hita dohot Simatuam di jabu on” ninna Ompu Pangadean boru mandok si Togi na martahi laho ibana dohot si Kartini mandok si Polin asa marsipanganon di bagas nasida.

“Dang gabe dokdok tuhuhon molo ingkon dohot simatuaku annon?”

“Dia dokdok i, ai so ingkon maneat pinahan lobu ho ala ro simatuam mardalani rap dohot laem tu jabum. Holan dalan marsirarion do na mangan i” ninna Ompu Pangadean boru.

Marsogotna i dung mareak tonga ari saut do ro si Polin dohot duansa natorasna laho marsipanganon di bagas ni ibotona si Kartini.

Mansai porhot dijalang Ompu Pangadean ibotona Amani Polin dohot edana Nai Polin, suang songon i paramanna si Polin. Sude tahe nasida na opat na sajabu tung mansai las roha nasida haroro ni tamue nasida asa rap marsipanganon nasida.

Dung sidung nasida marsipanganon, ganjang nasida marsirarion, marsarito, tarlobi si Polin dipatorang ibana pardalan ni singkolana dohot rohana laho karejo tu Pakanbaru di parusahaan na mandiori miak ala tammat sian jurusan pertambangan do ibana.

“Tu hamu Abang Togi dohot ibotongku, nunga turpukmuna padua songon i ingkon hamu na dua nama na gabe paturehon Among dohot Inong songon i nang Amangboru dohot Namboru. Pangidoanku dos rohamuna Abang dohot itoan on manganturen natuatuanta on. Tarlumobi molo toho ngalian natuatua on ingkon denggan do anturehononmuna” ninna si Polin tu huhut mamereng dompak Laena si Togi.

“Bah. Boasa dohononmu abang tu laemon Among?” ninna Ompu Pangadean boru.

“Ai di ginjangku do dua taon Abang on, jala na uju i pe sai abang do ahu manjouhon ibana” ninna si Polin.

“Naujui i do i Tulang naposo. Ianggo saonari ingkon lae do dohononmuna tu si Togi. Jala si Togi pe haduan molo dung marhasohotan hamu jouhonanna ma tu hamu Tunggane, alai ala so marhasohotan dope hamu boi ma jolo jouhonna hamu mar Lae. Ndang boi be dohononmu abang songon na uju i. I do tanda na so ise hamu asa tangkas diboto jolma i” ninna Ompu Pangadean doli.

Marsialusan nasida, marsipasahat hatana be, sipata rap mengkel. Olo sipata gabe songon na marsipansotsothon hatana be, marsitipaan hata nasida alani hottotna roha nasida na marhulahula boru i.

“Jai, andigan do hamu Lae borhat tu Pekanbaru?” ninna si Togi tu si Polin.

“Ingkon jolo sian Jakarta nama muse ahu Lae, ala di Jakarta do Kantor Besar ni Perusahaan i, muse angka ijasahku pe so buat dope” ninna si Polin mangalusi.

“Paboa hamu molo laho mulak hamu da Lae” ninna si Togi.

“Pola dipadua hali ho manungkun Laemi Togi, ai na naeng lehononmu do ongkos ni Laemi mulak tu Jakarta?” ninna Ompu Pangadean boru huhut mengkel.

Hohom Amani Polin dohot Inantana i mambege pargaiton ni  Ompu Pangadean boru tu helana i.

“Aha huroha singkalna molo si Togi mangongkosi Tulang naposo on mulak tu Jakarta. Songon pandok ni natuatua : songon na mandanggurhon tu dolok do mangalehon tu hulahula, sai matua tuat do singkat ni na ni lehon tu hulahula marlompit ganda marhitehite tangiang dohot pasupasu ni hulahula i” ninna Ompu Pangadean doli.

Gabe songon na unduk si Togi, songon na tarjergot panghilalaanna ala ni hata ni natorasna i. Songon i nang si Kartini dang tarberengna ibotona i.

“Adong dope hepeng hutiop hami, ai so habis hepeng na sinali nami nantoari sada. Sae dope ongkos ni si Polin i laho mulak” ninna Nai Polin ala tompu asi rohana marnida helana i.

“Daong ninna hamu Inangbao. Dang sala pardungketdungketan ni helamuna on mangongkosi Laena. Muse so bait na so adong laho patupaon ni si Togi, ise be dongan ni Tulang naposo on marariari, marsisungkunan ia so tu laena dohot ibotona parumaen nami on. Hita pe ninna hamu ingkon so marnaloja do tu angka gellengta on laho mangajari asa boi nasida muse marsitungkolan marsipadimundimunan. Halahon nama haduan na sapanganan, sapanghilalaan, ianggo hita na laho matenama” ninna Ompu Pangadean doli.

Gabe sai tungki do Nai Polin, dang tagam rohana songon i burju ni Ompu Pangdean hape tu nasida tarlumobi tu anakna i. Dang adong dibahen nasida dao helana si Togi tu nasida simatuana dohot tu gellengna. Dang dibolati Ompu Pangadean hape boruna i tu ibotona nang tu nasida natoras ni si Kartini.

“Bah gabe hohom do ho Togi, na borat do dihilala ho hatangki?” ninna Amongna tu si Togi.

“Daong Among. Toe ma Lae, marsogot ma i tahatai, hea do i Lae pasombuonku Lae?. Tangianghon hamuma Among, Inong dohot Lae anggiat hami tarlumobi borumuna naung denggan pamatangna asa hipas ibana dao angka parsahiton dohot angka hangalan. Pos roha ni Lae, songon pandok ni Lae nangkin haminama na laho manganturehon Among dohot Inong on di huta ala hamu laekku na opat sude do dao. Dang na pajolohon hata ahu dohot ibotom on, sai tamba ma angka si las ni roha ni hami nang di hita saluhutna jala tiur angka pansarian dang tung gabe so rohahononku Laeku halak Among dohot Inong, ai nunga huetong nasida songon apala natorashu. Dang marimbar i di ahu, songon ibotom on na mambahen ndang marimba songon apala natorasna simatuana na dua on. Tangiangkon hamu ma sai lujuluju nang pansarian di hami ” ninna si Togi pohot tu si Polin.

“Hahahaaaa, nunga songon Hampung hamu hubege lae na manghatai. Nunga boi hamu haduan pilliton ni huta on gabe Hampung. Hahaha” ninna si Polin patudu las ni rohana tu laena i.
“Hampung…..hampung aha ma boi Laem on molo olo dope mabuk jala mulak borngin. Dang uraura gabe hampung Among “ ninna Ompu Pangadean boru mangehet si Togi.


>>>>>>>>>marudut>>>>>>>>>>>

Masukkan email anda untuk berlangganan artikel kami