HAMPUNG TOGI - MARTAHI RO SIMATUA NI SI TOGI



Panurat: Tansiswo Siagian.

Tarsonggot si Togi ala tompu so marboaboa si Kartini naung di jabu simatuana boru Nai Polin manghatatai dohot natorasna na dua i rap dohot ni olina. Hape ansung songon i do ibana marpahean ala i dope ibana mulak sian balian. Humarorojor ibana maningkati pahaeanna mamangke mandar laos dialithon marlopes songon i nang pe so martapian dope ibana mulak sian hauma, unang apala songon i marpitolon pendek rohana laho manjalang simatuana i.

“Bulus ma ho Pae martapian so tung gabe lalap ho annon gabe losok roham martapian annon dung golap ari” ninna si Kartini huhut mangalehon anduk tu Amantana i.

Tung disangahon si Togi do mangapus siubeon ni inantana i lambok huhut mangumma pardompahanna, ala ni panarihon ni si Kartini tu ibana. Lam ganda tahe holong ni si Togi dung lam sorat si Kartini mamboanton langkana na so sae i dope, tarlobi muse nunga lam balga siubeon ni Inantana i ala nunga gok pitu bulan bortian ni anak buha baju ni nasida i. Tamba tahe uli ni si Kartini dungkon sidung ibana mangae ala manigor hatop do ro tamba ni dagingna, tamba mokmokna atik pe sai maos didok Bidan tu ibana asa unang nian mamokmokhu ibana mamboanton uranganna i.

Si Togi pe muba do nuaeng hinsana mangurupi inantana i di jabu. Tung so hea be dipasombu ibana ripena i sasada ganup manogot  laho mardahan dohot paias pahean ni nasida. Tarlumobi molo martuaek dang dilehon si Togi be ripena i tu aek so holan martapian, dang pulut rohana maloja hu si Kartini jala ngalian molo malelenghu di mual manantapi abit dohot mamuri panganan.

Ala ni holongna ma tu si Kartini asa holan ari minggu botari i nama ibana olo laho tu lapo marsirarion dohot donganna, atik pe sipata olo mohop pinggolna molo pajumpang dohot si Jannus, Sangkap nang si Monang na sai olo mangehetehet ibana mandok asa mamangke rok ibana ro tu lapo.

“Ai hamu poang naung dua urang be do niolimuna, aha na so dohononmuna. Tupa nuaeng uju parsaurangan ni olimuna be lobi sian ahu hamu manarihon ripemuna. Hape muba molo tu ahu so i nama pangehetmuna” ninna si Togi sada tingki tu donganna i ala sai mangehet ibana.

“Akh, ianggo ahu dang pola songon ho i. Tutu dang na hupasombu ripengku sasadasa mangulahon di jabu alai marnata do poang ndang songon ho. Sungkun sude jolma on, uju baru sohot jala mardenggan pamatang ni olingku, ganup botari do ahu tu lapo dang songon ho sahali saminggu” ninna si Jannus tong sai mangalesengi si Togi.

“Asing do antong hamu, dang songon ahu ala ingkon mangurus natorashu do hami sahali duansa. Antusima na marsajabu dohot natuatua naung matua palingpaling” ninna si Togi mambuat monangna.

“Unang sai patangitangi si Jannus i. Aha na so dohonon ni ibana, burju simatuana mangurupi ibana molo toho mardenggan pamatang Inangbao i” ninna si Monang mangampini si Togi.

Hape tompu digorahon Ompu Pangadean boru sian pintu ni mual i si Togi asa humatop martapian, ala nunga antar lumeleng simatuana i paimahon si Togi asa rap hundul nasida ala adong na naeng hatahononna tu nasida. Dihojoti si Togi sian mual, dipasigop ibana marpahean tu bilutna. Ditopot si Kartini muse ibana laho mangarade abit ni amantana i.

“Nunga, ahu pe mandiori abithu. Inong i ma dongani” ninna si Togi songon na marhusip.

Alai tong do dang olo si Kartini ingkon sai ibana do parade pahean ni amantana i. Dung dienet ibana abit sian lamari dilsurdukhon tu si Togi, dipanotnoti ibana muse amantana i marpahean asa rap nian rohana nasida haruar sian bilut manopot inongna dohot duansa simatuana i.

“Pahundul ma, nunga leleng eda on sian nangkin paimahon ho” ninna Ompu Pangadean boru.

Dipahundul si Togi jonok tu inantana i. Ditait ibana sada sigaret ni Amongna na peak di jolona i, dipagara ibana dohot loting, dung i dialsip ibana nanget.

“Apala aha hian huroa Inong na ringkot gabe urmun hamu ro “ ninna si Togi lambok manghatahon.

“Nangkin nunga nian dihatai hami dohot Inangbao, alai ringkot do paadaran tu ho ala tu hamu na dua do hata on jala ulaon on?” ninna Ompu Pangadean doli mamuhai hata.

“Ulaon aha i Among?” ninna si Togi.

“Ala dang sae langka ni parumaen jala nunga pitu bulan, naeng patupaon ni simatuam tu hamu mangirdak parumaen. I do hinarohon ni Eda tu jabu on” ninna Ompu Pangadeanboru.

“Mangirdak?”

“Mangirdak, mangalehon ulos mula jadi, mambosuri, manonggot, marragam ma goarna alai sada do ianggo lapatanna. Mangalehon sipanganon simatuam hulahula i tu hamu tarlobi tu parumaen ala on dope buha baju di hamu laos mangampehon ulos mula jadi tu hamu songon dalan pangidoan asa dao angka mara, hipas parumaen laho marharoan bolon haduan, asa molo jumpang di tingkina gok ma di bulanna laho hipas parumaen anggiat tulus dan adong hangalan dohot angka na mangambati boi tulus langkana manomu haroro ni anak buha baju di hamu. I do ni dok ni Eda on” ninna Ompu Pangadean boru.

Mangunduhi si Togi. Nunga nian manang piga hali diida ibana ulaon songon i atik pe dang singkop diantusi ibana ulaon mangirdak songon on.

“Jai andigan ma ulaon i patupaonta, jala aha sipatupaonnami Inong?” ninna si Togi manungkun tu simatuana i lambok.

“Molo dos rohanta nian di ari Sabtu on ma tapatupa” ninna Nai Polin simatuana i.

“Boha hamu among dohot Inong, molo ahu hurang huantusi do i?” ninna si Togi

“Nunga na denggan i ala so pola pangaradeon na bolon taringot tu si. Holan on tutu ringkot do botoonnami hira sadia godang ma hamu hulahula i laho ro tu bagasnami on” ninna Ompu Pangadean.

“So pola piga hami ninna hamu laho ro, alai pangidoan tapatibu ma ulaon i tagan di parnangkok ni mataniari” ninna Nai Polin.


Hatop do dos roha nasida, jala boi marsiantusan muse nasida. Tarlumobi Ompu Pangadean mansai las rohana marnida simatuani si Togi i ala nunga marimba idaon ibana dang be sai runtus manghatai songon na saleleng on. Toho tutu, songon pandok ni angka jolma i nunga maruba Nai Polin dung marhamulian si Kartini, nunga mimbar ritingna i dang songon na somal be. tarlumobi dung diida ibana burju ni Ompu Pangadean tu boruna i dohot holong ni helana i tu si Kartini.

>>>>>>>>>>marudut>>>>>>>>>>>





Masukkan email anda untuk berlangganan artikel kami