HAMPUNG TOGI - LUMOJA DO INA I TUNG PE DI JABU ?


Panurat: Tansiswo Siagian.

Dung sidung dijeksi Bidan i si Kartini dohot Inong ni si Togi jala dilehon muse ubat pel tu nasida na dua, tung disangahon Bidan i do mandok hatana tu si Togi di emper jabu i.

“Pardaging na retes do Inantami Togi, uraura do i marsahit tarlumobi molo so sa langkana songon saonari. Ia angkupi ibana unang holan ibana gopala mulaulaon di jabu. Idama nunga magale hu dagingna tung pe huida ganup ari ibana minum susu. Alai songon i do huroha bangko ni si Kartini molo mardenggan pamatang, gabe hurang langkuna mangan. Alai adong muse halobianna ndang sai mutautai ibana molo mangae. Jadi songon i ma bangkona, dang boi maloja hu ibana saleleng mardenggan pamatang” ninna Bidan i.

Dang boi dialusi si Togi mardomu ala maila ibana tu Bidan i pola songon i marsahit niolina ala malojahu mulaulaon di jabu. Tungki do si Togi hohom songon gansip ni odothon.

“Ingot ma i da Ito, asa hipashipas niolimi ingkon angkupanmu do ibana di jabu, unang paloas holan ibana karejo. Muse nda patutna do pe nian si Kartini dope moingoing ala on do pe uranganna? Jala ingot bajar dope Inantami marrumatangga hamu, so tung gabe bait dia binoanna i?” ninna Bidan i muse songon na mangondam si Togi.

Mamungka sian i ma diantusi si Togi loja ni Inantana i tung pe holan di jabu. Ai pola tahe sahat tu toluari si Kartini lalap sai peak di podomanna ala gale ni pamatangna. Domu ma muse Inongna na dohot hurang sehat gabe ingkon si Togi ma paias pangkean naung diengge di sumur nasida i. Ibana muse ma mardahan, manjaga tigatiga pupukna di hambirang ni jabu nasida i.

Diae si Togi ma tahe hansitna dohot lojana songon ni ae ni si Kartini. Ai hira so olo do diida ibana sae ulaon di jabu. Nunga sidung mardahan indahan, ingkau dohot lompan, ingkon mamuri pinggan dope, paias jabu, manattapi abit dung I manjaga tigatiga muse.

Botari lam godang ma ro panuhor tigatigana, hape ingkon mamuri piring dope ibana, paias jabu muse, mandaik abit sian herean jala ingkon lompitanna muse, asing muse dope paias alaman ibana botari dung sidung ibana mardahan. Ee, ingkon tutuponna muse kios partigatigaanna i, dung i padirionna muse parsulusuluan ni horbona di pudi. Tagan so mardaop podu dung sidung ibana martapian ingkon ulakhononna muse ma paias jabu ala nunga songon na risi didege ibana lante ni jabu i.

Dung i ma gabe maruba si Togi, dang olo be pasombu si Kartini sasadasa mulaulaon di jabu atik pe nunga hipas jala nunga boi mulaulaon niolina i. Dang maila be si Togi tung pe tarbereng jolma I ibana sipata paias jabu manang mangherehon abit tu sangkotan di siamun ni jabuna i.

‘Na martua do hape hami dang manigor manjae, ai aut manigor manjae dang adong be Inongku na boi mangangkupi si Kartini ia tung pe holan paias jabu, mandaik abit sian herean, manutung parsulusuluan ni horbo, paias alaman dohot hundul manjaga tigatiga di kios. Olo hian ma hape humatop marsingkor ibana mananonton lojana ai so olo ibana mangholsohon na maloja hu ibana mulaulaon tu ahu’ ninna roha ni si Togi.
Si Kartini pe sipata nunga boi moing-oing ibana molo dung simpul nasida marsipanganon bornginna i ala nunga olo si Togi mandasdas inantana i asa humatop mangulon.

“Pasombu ma disi, ahu pe paias meja i dohot mamuri piring borngin hon asa huhut huhodohon pangalompaan ni tes” ninna si Togi mangabit jotjot niolina i asa unang maloja hu, jala asa boi nian mangulon humatop.

Gariada manogotna tibu olo nunga jumotjot si Togi humatop dungo huhut manggorgori aek asa boi ibana mambahen kopi inumonna dohot amongna huhut mambahen susu di si Kartini. Hira dang hea be si Kartini dipaloas si Togi manogotna I sasadasa mangulahon ulaonna hian dung na marsahit I si Kartini.

“Boha, nda nunga diae ho somantak lojana tung pe holan na di jabu?. Baliksa ma haduan nunga adong anakmu manang piga halak. Huuhhh, mardahan, paias abit, paias jabu, paridihon, manganturen susuna, bubur, asing dope na tangis, marbadai, dohot muse ingkon sipata paiasonmu kotoranna. Miok ma tahe molo dung adong pigapiga ianakhon” ninna Ompu Pangadean boru tu si Togi.

Hohom do si Togi, holan engkel supingna do dipaherbang mambege hata ni Inongna i.

“Idama ne I nuaeng parumaen nunga manigor hatop mokmok muse dung so malojahu be ibana na parpudion. Boha hianma nian sian mulai denggang pamatangna pintor dihabit ho parumaen d alas ma rohana?. On gabe ho do antong moing-oing tu parumaen hape nunga matua ho dao tumua sian ibana, nda pantasna ingkon si Kartini do nian moing-oing tu ho ala bajar dope ibana. Alai nunga ma i naung salpu i, hot ma urupi sipata parumaen di jabu asa bulus nang rohana mangurus dagingna dohot mangharingkothon na binoanna i” ninna Ompu Pangadean boru manguduti hatana tu si Togi.

“Inong boha do huroha naujui tingki imbaru sohot tu Among, moing-oing do ho tu Among? Manang moing-oing tu simatuam” ninna si Togi.

“Boha do bahenon moing-oing. Ai amongmu do siangkangan, onom tinodohonna jala tading di jabu do i sude. Hatop do hami manjae na ujui dibahen ompung na hinan asa unang gabe tubu partuktuhan tu angka amangudam dohot namborum. Boha ma nunga dua pajanggaljangal dolidoli Amongudam dohot sada na marbaju Namborum par Kisaran” ninna Ompu Pangadean manatap dao manang dompak dia marningot uju imbaru marhasohotan ibana dohot Ompu Pangadean doli.

Tompu ro si Kartini manjonok tu nasida, dipahundul si Kartini di siamun ni simatuana i huhut sai maniop siubeonna, ala songon na mulai olo pesepese di siubeonna i humusor nanget.

“Dang mahua nian dihilala ho?” ninna simatuana i mangadu roha ni si Kartini.

“Daong Inong” alus ni si Kartini huhut maniop tangan ni simatuana i.

“Tabo ma da hamu ala manigor manjae, dang gabe lalap di jabu ni Ompung” ninna si Togi manorushon sungkunsungkuna tu Inongna i.

“Ehehe, dang sanga hutatap na tabo Itonan ala dang sorang dope haham Amani Pangadean nunga pintor marujung ngolu Ompungmu boru ala marsahit, jala dang sadia leleng muse mangoli ma Ompungmu doli marpanoroni. Ima bonsir ni singkam mabarbar parsorionku songon parumaen siangkangan” ninna Ompu Pangadean boru tompu lungun rohana marningot porsuk ni aena uju i.


>>>>>>>>>>>marudut>>>>>>>>>>>>>

Masukkan email anda untuk berlangganan artikel kami