HAMPUNG TOGI - TOMPU MARSAHIT SI KARTINI



Panurat: Tansiswo Siagian.


Holan sahat arian i si Togi sian balian, nunga dapotna si Kartini sai peak di podoman, gale ninna pamatangna songon na marun panghilalaanna. Didadap ibana bohi ni niolina i, songon na alas dagingna, marlangan muse pardompahanna mansai gale so marsumangot si Kartini. Tompu asi rohana marnida si Kartini huhut busisaon jala lomos roha ni si Togi mardomu muse ala na mardenggan pamatang i niolina i.

“Hualapi ma jolo Bidan da, asa dipareso jolo ho” ninna si Togi tu niolina i mardongan lomos ni roha.

“Humatop ma alapi Pa’e, alana Inong pe sian na bodari tong do hurang sehat” ninna si Kartini gale huhut mamereng amantana i songon na mangelek panatapna.

Dang sanga be dialusi si Togi, humalaput ibana marlojong tu mandopothon Bidan Desa Nai Basar di punsu ni banjar huta nasida i. Dang dipatontu ibana be adong pigapiga halak na manise ibana di dalan i holan asa humatop rohana sahat tu bagas ni Bidan i. Songon na lalap targombar di jolona bohi ni si Kartini na marlangan dohot gale ni pamatangna, mardomu musema dohot pangelek ni simalolongna songon na mandok: asi roham Pa’e pahatop ma mangalapi parubat.

Hape dung sahat ibana di bagas ni Nai Basar i ma Bidan Desa i, toho apala i  pe nasida mamungka mardaon pogu arianna.

“Jolo sidung ma hami marsipanganon humatop pe ahu ro tu jabumuna” ninna Bidan i.

“Dohot muse do Inonghu hurang hipas, pahatop ma Inang” ninna si Togi

“Olo, pos ma roham. Manigor hulangkahon pe molo dung sidung hami mangan”  

Busisaon si Togi ala ingkon marpainte jolo sidung mangan Bidan i asa boi ro mamareso si Kartini dohot Inongna. Tompu muse ma diingot ibana si Kartini; Atik na so mangan dope nuaeng ibana dohot Inongku, ninna rohana marhusari. Akh boasa gabe songon on sahali marsahit nasida nadua?
Dihojoti ibana muse mardalan dompak jabuna alai ianggo ateatena nunga sai marbahir so martontu. Dang hea dope ibana songon on tubu biar dohot lomos ni rohana mangadopi na marsahit, pola gabe songon na so ontong rohana laho mangulahon aha si ulaonna.

“Nunga mangan ho Ma’e?” ninna si Togi lambok tu si Kartini dung sahat ibana di jabu.

“Dang adong rohangku laho mangan, ijurhu pe mansai paet huhilala. Inong i ma jolo idahon satongkin tu bilutna i. Ianggo Among ninna tu Sirpang Tolu do nangkin, tontu nunga mangan disi ibana pola pukul songon on dang mulak dope” ninna si Kartini gale.

Ditopot si Togi tu bilut ni Inongna i laho manosoi asa mardaon pogu nian Inongna i.

“Boasa pola ingkon ahu pingkirhononmu, ia parumaen i ma jumolo anturehon, ai tu dia do laho pingkiranmu?. Na ma lojahu do si Kartini i gabe marsahit ibana. Toe, ibana ma jolo sosoi asa mangan” ninna Inongna i tu si Togi.

Laos so marhasoan be si Togi. Diondihon ibana niolina i alai si Kartini mandok asa simatuana boru  jumolo dianturen si Togi. Ia laho ibana tu manopot Inongna tu bilutna hape hata murukna do na ro mandok asa niolina i jumolo dianturen. Dang diantusi si Togi be manang mangulahon dia, laos ngongong ma ibana ala ponjot ni rohana.

Dilangkahon ibana dompak pudi. Disigati ibana tu pardahanan. Marjea ma tahe, nda holan indahan dope naung masak jala laos songon i di ginjang ni tataring i. Didadap ibana dompak lamari na somal inganan ni ingkau dohot lompan naung masak, so adong agia aha lobi sian tebateba ni lompan nasida na sogot. Dibereng ibana dompak mual, bah…laos songon i dope abit nasida diengge di ember so hona taptapan.

 ‘Tontu naung tibu do si Kartini sian na sogot marsahit asa ndang paias abit ibana jala dang mangalompa lompan’, ninna roha ni si Togi marsak.

“Togi, Togi di jabu do ho?” ninna Bidan Nai Basar manjou si Togi sian duru.

Dang dope dialusi si Togi nunga bongot Bidan i tu bagas nasida mamboan ulaulana dihadang di bagasan tasna.

“Tu bilut ma hamu asa pareso jolo ibana” ninna si Togi mandok tu bilutna.

Dipaharuar Bidan i angka ulaulana, dijama ibana dohot tanganna pardompahan ni si Kartini. Dibahen sidodo tensi tu botohon ni si Kartini huhut disolothon sidodo mohop tu gedekgedek ni si Kartini. Dung i didodo ibana dohot ulaulana i dompak andora ni si Kartini.

“Na maloja hu do ho kedan, tensim pe toru. Songon na mohop muse dagingmu. Onma ne i hurang mudar do ho huhut” ninna Bidan i dung songon na dipatangkas maningada simalolong ni si Kartini.

“Hape ho mardenggan pamatang, jagaonmu do hasehatonmu unang maloja hu ho. Idama dagingmu pe nunga lam marniang, boha ma haduan ho manubuhon anakhonmu molo so adong gogom” diuduti Bidan i hatana huhut mangapus siubeon ni si Kartini.

“Na hurang mangan do ho? Manang na so minum susu do ho poang manambai gogom asa tolapmu mangalompa, manunsi, manaringka dohot martigatiga?. Unang maholithu ho poang Kartini so tung bangkilison haduan anakkonmon sorang” ninna Bidan i.

Ting. Songon na malliting tu pinggol ni si Togi hata ni Bidan i. Dihilala ibana do tinembes ni hata ni Bidan i tung pe tu niolina i dihatahon. Songon na ditusuk hata ni Bidan i tombus ro di pusupusu.

‘Na maloja hu do si Kartini, hurang mudar, dagingmu lam marniang, na hurang mangan do ho?. Na so minum susu do ho manambai gogom, unang maholithu ho, sotung bangkilison haduan anakkonmu sorang, jala boha bahenonmu manubuhon anakhonmu molo so adong gogom’.

Songon na didondoni batu na bolon do panghilaan ni si Togi mambege hata ni Bidan i. Songon na manosak di andorana. Dang tartaon ibana pandok ni Bidan i.

Tompu manginongi roha ni si Togi di sude hahuranganna na hurang mamparateatehon niolina i na saleleng on, na hurang mangalehon rohana palumbanghon ulaon ni si Kartini di jabu.Lalap do holan mamingkirhon pardalan ni ulaulana i ibana dohot manguluhon parkarejona di balian. Diongkuhon ibana do ndada hea diurupi ibana niolina i mangulahon ulaonna di jabu, holan si Kartini do diparbaga ibana mangulahon i sude.

Gabe tompu manolsoli si Togi songon na mardosa jala tung balga hasalaanna tu niolina i, hape ianakkonna do diboanton niolina i. Hatuaonna do na diboanton sorat ni pamatang ni si Kartini. Amongna dohot Inongna do dipauneune si Kartini di jabu huhut martigatiga.

Nanget sumurut si Togi dompak pudi, naeng ibana marsurak patolhas panolsolionna, mangusehon ponjot ni rohana ala pangalahona i asa mangido sala rohana tu si Kartini. Naeng ibana hatop manghaol niolina i mandok: nunga sala ahu na saleleng on Ma’e jala marjanji ma ahu na ingkon angkupan nama ho tu joloan on laho mangulahon ulaon di jabu asa jumengkar dohot humipas ho ; asa sehat ho jala adong gogom laho sorang buha bajunta i sogot, unang bangkilison sorang sogot ianakhonna songon pandok ni Bidan i.

>>>>>>>>>>>>>marudut>>>>>>>>>>>> 

Masukkan email anda untuk berlangganan artikel kami