HAMPUNG TOGI - TUNGGANE BORUMI DO, HATUAONMU



Panurat: Tansiswo Siagian
“Molo dung marhasohotan sada baoa nunga boi ibana ‘panungganei’. Panungganei marlapatan uluan, paniroi, pamimpin ma goaron ibana. Huhut ni nunga gok be tohapna na boi gabe silehon pingkiran, pandapot hata, haputusan di sada huta manang bius isara ni uhum dohot adat, ala nunga marsaripe ibana dohot niolina. Gabe uluan ma ibana di bagasna didokma ibana tunggane doli jala niolina i tunggane boru. Angka tunggane doli do boi pilliton gabe uluan ni huta, uluan ni adat, uluan ni horja, uluan ni bius, ala nunga adong inantana na gabe tunggane boru di bagasna. Ai ala na adong i do niolim asa boi dohonon ho gabe panungganei manang tunggane doli, aut so adong niolim nda dapot goar ho tunggane doli” ninna Ompu Pangadean lambok.

“Nunga huantusi i Among” songon na sulpak si Togi mandok hatana.

“Molo dung diantusi ho, boasa hape songon solang solang so siat dibahen ho tunggane borum. Holan songon anak somangmu di bagasmu manang holan songon naposom sambing sioloi sude pangidoanmu dohot siulahon sude haporluanmu dibahen ho ibana?. Dang dibahen ho sisada sangap jala sisada harajaon ho dohot tunggane borum, hape sintongna na dos do hamu tung pe ingkon ho pajoloon tu tonga ni mangajana alai ndada gabe holan songon sitiop hajutmu sambing tunggane borum” ninna Ompu Pangadean patorangkon tu anak siampudanna i.

Sangombas hohom nasida marsiboan rohana dohot pingkiranna. Ianggo si Togi nunga sai diultong na mangisap sigaretna i so marna mangulon lalap sai marganti digalahi molo dung suda na sada.
“Nunga dapot roham nuaeng na hudok i?” tompu disungkun Ompu Pangadean muse si Togi, gabe songgot roha ni si Togi.

“Ai so hea manang dia rohangku tu parumaenmi. Hamu do huida maampin hu tu si Kartini, hape muba tu ahu maos murukmuruk hamu holan bonsir saotik luluanmuna tua hu” ninna si Togi

“Hami maampinhu tu paruamen nimmu do?”

“Maampinhu ma da, pangalobian hamu. Hira naung apala boha ma nuaeng diida hamu bobang ni pangalahongku” ninna si Togi huhut padao bohina sian amongna i.

Bah, nunga sala on. Nunga gabe dipasuhar si Togi on hata tu iba. Gabe naeng mangalului monangna do huida anaha on, ninna rohani Ompu Pangadean.

“Jai, ise do ampinanku. Ho do?. Boha do bahenon mangampini ho, laos so adong do huida asi ni roham mangida parumaen i na tongon nuaeng mardenggan pamatang?. Ai na ngernger roham lojana diae parumaen, hape ingkon songon i muse pangalahom tu ibana?. Nda hagabeonmu, hamoraonmu, hasangaponmu do nuaeng binoanton ni parumaen i? Bernit diae parumaen mamboanton haulionmi I ma nanaeng tubuhonna sogot, gabe siboan goarmu do i, sitorushon tarombom dohot sijujung baringinmu” ninna Ompu Pangadean

“Nunga hudok nunga huantusi i, aha dope among?”. Dang tarbegebege si Togi hata ni amongna na sai mangarusuhi tu ateatena.

“Hee, santabi jolo kedan. Manghatai ma jolo hita na dua ala rap baoa hita, unang ala among jolo ahu etong poang sahalion. Hata ni dua baoa ma jolo hatanta on” ninna Ompu Pangadean songon na gogo soarana.
Tompu mangirput roha ni si Togi, nda tagam rohana songon i pola hata ni amongna i tu ibana. Alani gabe tubu biarna lam muruk amongna i tu ibana.

“Ai so dia hudok among tu ho; Nunga huantusi ningku do” ninna si Togi nanget huhut tubu lomos ni rohana paima alus ni amongna i.

“Las ma roham nian nunga mardenggan pamatang si Kartini, astuanna denggan do ho; Baoa do ho hape, jala borua na denggan do si Kartini. Ai aut sura dang marna mardenggan pamatang si Kartini, ai adong sangapmu manang argam songon sada baoa?. Molo laos so mardenggan pamatangan niolim na jumolo tihaan ni jolma i ingkon ho do, ndang niolimi. Jadi martua ma ho songon sada tunggane doli ala dengan tunggane borum, alani argai, pasangap, haholongi, jala bagas antusi ala ni tungane borumi do ho boi martua, boi marsangap, boi mamompari haduan dapotan tua ho di ngolum anggiat maranak marboru. Ai aut so adong tungane borum aha laho hirimonmu, tu lubang ni hirik i luluanmu hatuaonmu?. Jadi ingkon dos do poang nangkokna dos tuatna. Ndang adong imbarna hamu nadua ingkon na marsitungkolan do, marsiaminan, marsipasangapan jala marsianjuan huhut rap manaon di nahansit na bernit asa dos rohamuna mangeahi angka nauli na denggan si halassononmuna di pudian ni ari”

“Olo among, alai unang holan ahu ungutunguti hamu”

“Aha ungutan paruamaen huroha, so adong sitihaan pangalahona. Gariada mansai las roha ala ndang hirim roha pintor songon ni dengganna marrumatangga tarlumobi manganju ho ala poso dope nasida. Nietong hian do ingkon nasida lalap podaan, manang ingkon ho manganju nasida hape balikna do poang na ro gabe ho do sipodaan, jala ingkon nasida manganju dohot manubut roham” ninna Ompu Pangadean mardongan engkel nanget tu si Togi.


>>>>>>>>>>marudut>>>>>>>>>>>

Masukkan email anda untuk berlangganan artikel kami