Hampung Togi - NEANG DO ULAON MOLO DOS ROHA


Panurat: Tansiswo Siagian


Hohom nasida na tolu, tarlumobi Ompu Pangadean boru. Diingot ibana ujui ndang do pe sorang si Balonggu, tompu marujung Simatuana boru ala ni sahit na songgot so dung sanga nanggo diboan nasida tu parubatan. Hatiha i lima bulan dope si Balonggu Amani Pangadean anak buha bajuna i di bortian marujung simatuana i. Hape tolu bulan dung mabalu nunga manigor mangoli muse simatuana doli nang pe sude ianakhonna mangorai Simatuana i mangoli muse, ia di roha nasida molo tung pe ingkon mangoli nanggo jumolo mangulon nian apala sataon. Alai dang ditangihon simatuana i pangidoan ni sude gellengna i, dituntun do asa gira mangoli. “Asa adong donganku manganturen dakdanahon” ninna Simatuana doli marsidalian.

Na humansit ala maringkon do Simatuana i ingkon mangoli nang pe dang tarjalo sude ianakhonna na ulau i, gabe sai gunturma sude anggina dohot edana. Gabe jotjot nasida murak marbadai tarlumobi Simatuana doli dohot angka gellengna. Dang hinata nian, boha pe Simatuana i ingkon ondihononna do niolina i ala sipata sahali sude gellengna mamungka bada tu Inongna panoroni i. Gabe olo ma gabe sipanotnotan parbadaion ni Simatuana i di huta i.

Alai na mambahen porsuk parniahapan ni Ompu Pangadean uju i, na so olo i be ibotona dohot anggina na gumelleng, 2 anggina 2 ibotona tading di jabu ni Amongna, gabe ingkon maisolat ma i rap dohot Ompu Pangadean tung pe nasida na imbaru manjae dope.
Dang holan i, haru nang pe angka anggina naung dolidoli tahe olo do silluksilluk ro tu jabu nasida laho mangan ala marbada dohot Inongna panoroni i dohot Amongna.

“Boha do huroha pandok ni halak Among” ninna si Kartini tu Simatuana i.

“Maos do nian dipasingot simatuam angka anggina dohot ibotona, alai tung mansai jogal do nasida maol mambege poda ni simatuam. Boha ma dohonon nian, ai so pultak do he simalolong ni Ompungmu boru dung mate nunga manigor ro panggantina hape nunga diorai hami hian nian Ompungmu doli” ninna Ompu Pangadean boru patorangkon tu parumaenna i.

“Alai pandok ni Namboru dohot Amonguda hamu pe ninna dang sipangorai mangoli Ompung?” ninna si Togi.

“Boha do dang sipangorai, dang manjua. Ianggo toho so diboan Ompungmu pangganti i bah leleng do Amongmu jala mansai koras do mangalo unang manigor mangoli Ompungmi. Alai ala naung manuntun Ompungmu doli dang tardok Amongmu be songon dia lobi holan parsip ibana jala sai mangapoi roha ni angka anggina dohot ibotona” ninna Ompu Pangadean boru.

“Jai, sanga do piga dakdanak sian Ompungboru panoroni i” ninna si Kartini.

“Ai so sanga adong tubuna, so gok muse nasida sataon marsaripe?”

“Boasa Inong dohononmu songon i, na sirang do nasida?” ninna si Kartini.

“Songon i ma poang huroha tingkina, gabe lintun do Inong panoroni i dung hira dihorus angka mas ni Ompungmu. Lintun so tarboto manang tu dia habang manadingkon Ompungmu doli” ninna Ompu Pangadean boru manatap dao atik dompak dia rohana.

Diingot Ompu Pangadean sude na masa i. Diingot ibana dungkon lintun panoroni ni simatuana i, tompu ma muse marsahit simatuana doli. Pola tahe leleng marsahit posa hape angka anggina dohot edana nunga hurang denggan tu Amongna, mardomu ma muse tahe ala sai disalahon simatuana i sude gellengna parlintun ni niolina na umposo i. Lalap do sai disolsoli Simatuna tahe sude ianakhonna i na mandok ala ni nasida do asa gabe lintun niolina i.

Alani parsahiton ni Simatuana i ma gabe ingkon mulak nasida sian jabu panjaeanna i tu jabu ni simatuana asa adong manganturen simatuana naung posa marsahit dohot mangaturehon sude tinodohon ni Ompu Pangadean doli. Dang tarjua Ompu Pangadean boru ingkon gabe mulak ibana tu jabu ni simatuana pature simatuana na marsahit dohot angka tinodohon ni parhalanguluna i.
Mansai hansit tahe diae Ompu Pangadean boru uju i. Ai gabe ampe tu ibana ma songon ina di jabu i, gabe Ina tu angka tinodohon ni amantana i. Gabe Ina nang so pola tang do pe mangadopi angka na marbaju dohot dolidoli, gabe Ina tu na so tinubuhonna.

“I ma poang upa ni siangkangan, upa ni inanta ni buha baju. Ai molo hasomalan ni adatta ai indada na matean Ina angka tinodohon nami, alai hami dohot simatuam do na matean Ina. Ingkon gabe ahu nama Ina tu sude tinodohonku, huhut manganturehon simatuangku doli” ninna Ompu Pangadean boru nanget huhut tungki simanjujungna mangingot bernit ni tinaonna uju i.

“Pola leleng diurus Inong ujui Ompung doli na marsahit i?” ninna si Kartini.

“Adong do sataon lelengna asa marujung Ompungmu doli, alai nunga pola sanga tahe marsingkor ibana. Gok suda artana laho parsiubatna. Hansit ma tahe diae Ompungmu doli, alai humansit ma ahu na mangurus angkangmu Amani Pangadean dohot Ompungmu dohot padimundimun sude anggingku dohot edaku” ninna Ompu Pangadean boru.

Hohom nasida na tolu marsipatulut pingkiranna be, tarboan rohana be mangarimangi parsorion ni Ompu Pangadean boru. Tarlumobi si Kartini, “ dang dia dope hape na huae on sian ni ae ni simatuangkon. Patut do songon i burju ni simatuangkon tu hami ala naung diae ibana do hape hansit ni na manghunti manganturehon angka tinohonna” ninna si Kartini di bagasan rohana.

“Martua dope ahu, dung monding Ompungmu doli manigor muba do roha ni angka tinohonnami jala olo manangihon simatuam doli. Jala muse manigor hatop do marhasohotan anggi ni Simatuam i ma Ompu si Barita. I ma dongannami manuhuk angka na hansit i, mordomu muse angginiba Ompu si Barita boru pe manigor boi donganku saroha jala marsitungkolan manganturehon sude tadingtading ni Ompungmi” ninna Ompu Pangadean boru.

“Jai, Inongnama hape pangolihon angka anggimi dohot pamulihon edam sude?” ninna si Kartini.

“Nunga bagianku songon i poang. Pitu tinodohonnami, pitu ianakhonku hamu, ahu ma sude gabe Ina ni on. Uji ma jolo marpikkir bagas, sampulu opat ma gabe ampe tu ahu. Ahu nama gabe Ina di nasida na pitu jala Inong ni na pituna i tubungku sandiri. Alai tupa do sude i ala asi roha ni Debata”

“Jai dang hea hamu marbada dohot sude anggim dohot angka namboru i?” ninna si Togi.

“Ianggo angka bada na gelleng somal do i, alai tutu dang gabe tu hansit ni roha. Sian sude i, burju ni Amongmu do Togi na so olo pasombu ahu manganturehon Ompungmu, sude Amongudam dohot Namborum nang dohot hamu sude hamu gellengku. I do asa sai muruk ahu tu ho molo huida parumaenkon dipasombu ho sahalaksa laho manganturehon hami, ai molo dos rohamuna, sada pingkiranmuna jala marsitungkolan hamu na dua marsaripe aha pe na masa gabe neang do i tuhuhon molo dos roha dohot dongan saripe niba”

“Olo, olo….nunga huboto i. Sai pintor disalihi Inong do ahu, dabudabu tu ahu murukmu apala sinungkun hea manang so hea hamu marbada. Nunga sae be i” ninna si Togi songon na mardandi.


>>>>>>>>>>>>marudut>>>>>>>>>>>>>> 

Masukkan email anda untuk berlangganan artikel kami