HAMPUNG TOGI - TONGKA MARTANGAN PUDI




Panurat: Tansiswo Siagian.

Dung mulak sian gareja marminggu, dung simpul muse nasida mardaon pogu, didok si Kartini hatana tu si Togi dohot Simatuana naeng manopot Inongna nian ibana. Dang hinata holan ari minggu do adong gumanggang tingki ni si Kartini ala so marbuka tigatigana.

“Nunga na denggan i. Sorohon ma manopot Eda i botari on, binsan adong tingkim. Huhut ni i tahe, apala aha umbahen ingkon topotonmu halak Eda saonari? Apala aha na ringkot? ” ninna Ompu Pangadean boru, manulingkit roha ni parumaenna i. Ai tubu biarna so tung mangido sipangidoon parumaenna i tu natorasna ala na so sae i langkana.

“Naeng laho Amongku dohot Inong tu Jakarta, laho Wisuda ninna ito si Polin” ninna si Kartini.
“Nahurimpu do adong sipangidoonmu tu Eda, isara ni sipanganon ala naung mardenggan pamatang i ho” ninna Simatuana boru.

“Bah….bah…” manigor minar pardompahan ni Ompu Pangadean doli umbege parumaenna i mardenggan pamatang “antong dongani ma parumaen tu jabu ni Simatuam, unang be pasombusombu sahalak nasida mardalan songon i” ninna manguduti huhut memereng dompak si Togi.

“Boan hamu adong pisang na malamun di pudi, asa adong siluamuna” ninna Ompu si Pangadean boru mangondolhon hatana tu si Togi.

“Jolo paorot horbo ma jolo ahu ate, asa rap laho hita tu jabu ni Inong” ninna si Togi.
“Maos do sai horbomi pingkirhononmu. Ai tu dia huroha si Tigor asa gabe ho paorothon horbo?” ninna Ompu Pangadean boru muruk tu si Togi.

“Antusi ma naposo, laho ibana marbola dohot donganna satongkin. Ianggo manait mulak annon ibana do. Holan paorothon do ahu satongkin” ninna si Togi.

“Jolo taruhon ma jolo parumaen tu jabu ni Simatuam asa sorohon paorot horbomi. Dung sidung dipaorot ho dapothon ma muse parumaen. Dang denggan sahalak parumaen borhat tu jabu ni Simatuam” ninna Ompu Pangadean Doli manghabit roha ni parumaenna i.

“Daong pola Among, sahalakhu pe laho” ninna si Kartini songon na bensut.
“Betama, pintor bensut do ho  ala adong asangasangmu mangampini ho Simatuam na dua on” ninna si Togi margait huhut manait tangan ni si Kartini.

Ujungna jolo ditaruhon si Togi do niolina i tu jabu ni Simatuana, dung i disorohon ibana tingkina paorot horbona tu adaran pudi ni huta nasida i..

Dipaboa si Kartini tu Inongna naung mulai mardenggan pamatang ibana, disaritohon ibana muse boha holong dohot pangampinion ni duansa Simatuana i tu ibana dohot boha pangalaho ni si Togi tu ibana. Dipatorang si Kartini sude tu Inongna i asa papos rohani Inongna i huhut asa tangkas diboto Inongna i ndang na sala pillit ibana di parhalanguluna i.

Dang pola dirohahon Nai Polin hata ni boruna i, alai rohana do diparroha, pingkiranna di padalan naeng pasahatonna tu boruna i.

“Songon on Kartini. Rohanami dohot amongmu naeng laho tu Jakarta ala wisuda ni ibotomon. Jai, naeng husali jolo hepengmi laho ongkos nami tu Jakarta” ninna Nai Polin.

“So adong hepengku Inong?”

“Dang adong hepengmu? Mandok sipiga do ho, ise be parhepeng molo so hela i be di huta on. Apala ongkos nami nadua dang tarpasiat ho hami marsali?” ninna Inongna  mangodothon hatana tu si Kartini.

Hohom si Kartini laos tungki simanjujungna. Hirim do rohana nian manigor patuduhon las  ni roha  Inongna i dung dipaboa ibana naung denggan pamatangna. Dietong ibana do hata mauliate jala patudu las ni roha Inongna i di angka denggan ni Simatuana i tu ibana saleleng on. Tagam do rohana puji on ni Inongna i Simatuana ala burjuna tu boruna i. Hape manigor hepeng do dihatahon tu ibana, manigor tahi marsali do dipajolo Inongna i tu ibana.

“Unang apala tu halak do rohangku marsali, maila iba begeon ni jolma i ahu marsali hape namora helaniba” ninna Nai Polin manurdukhon na di rohana i tu boruna i.

“Boti do Inong. Unang tu ahu hatahon hatami. Asa denggan ahu tu Simatuangku dohot tu helam, tagonan do hatahonommu tu helam. Dang olo ahu martangan pudi manang marbunibuni pasalihon hepeng tu ho Inong. Muse, on do pe hami mandasor martigatiga Napu, sadia godang modal ni helam tusi habis, ai na martua burju do Simatuangku olo manggadis masna manambai modal nami. Dang suman i Inong gabe tu ahu dohononmu hatam laho marsali?” ninna si Kartini mangalusi Inongna i.

“Molo dijua hela i do annon?”

“Bah, dang saut pasalihononku tu ho”

“Tumagon nama hape tu halak ahu marsali?”

“Inong. Songon na mangondam do hatamon tu ahu, mambahen dokdok pingkiranku hape nunga hupaboa mulai mardenggan pamatang ahu”

“Nunga sae be i. Na asing ma tahatai, tu jolma i pe annon hudiori parsalian”

Tungki si Kartini. Rohana i nian ndada pola sala pasalihon gariada mangalehon tu Inongna, alai unang tu ibana dihatahon Inongna i, so tung bait dia hata ni si Togi dohot Simatuana tu ibana. Dohononna haduan martangan pudi manang marsimongkel ibana tu Inongna. Alai, i ma na so bagas dipingkirhon Nai Polin unang adong gabe tihas  haduan di boruna i jala unang gabe partuktuhan i diparsaripeon si Kartini.

“Tongkinna i ro nama helam  ala nunga tingkina ahu laho mardahan, so boi Simatuangku doli tarlambat mangan, hatahon ma annon tu helam molo dung ro mangalap ahu” ninna si Kartini lambok.

“Dang pola be i. Tu na asing ma niluluan parsalian. Unang pola pingkiri i” ninna Nai Polin mamaus padao bohina sian boruna i.

“Dongkon ma tu helam annon, molo marsali dok marsali, molo mangido tingkos dok mangido. Ingkon torang do molo tu helam”.

“Ai aha dope, nunga hu dok tu na asing nama luluanku parsalian” ninna Nai Polin runtus.

“Balga do rohangku Inong tammat ibotongki Sarjana. Jala porsea do ahu dang manjua helam pasalihon hamu asa adong bohalmuna tu Jakarta, gariada atik urupan ni helam do hamu manambai ongkosmuna manang parsitesmuna di dalan. Alai tu ibana ma pasahat hatamon Inong. Molo marbunibuni do songon on, santabi Inong so tung menek roham dang laho olo ahu mangalehon i. Ia haru hepeng ni Simatuangku adong hutiop ingkon jolo marsungkun do tu hami molo laho pangkeonna muse. Hape hepengna do, holan na maniop do ahu” ninna si Kartini patorangkon tu Inongna i pola naeng ro iluna.

“Unang pola perut ilum bahenon ni i. Husungkun pe annon hela i molo dung ro” nina Nai Polin, “atik mangan roham, adong na sogot huarsik haruting disi” ninna Nai Polin. Tompu balik roha ni Nai Polin umbege hata ni boruna i, tompu ontong rohana dang di toru ni habongna be hape si Kartini. Tompu marbalik rohana, ‘ia haru Simatuana tahe ingkon manat tu borungki, lam ma ahu?’ ninna roha ni Nai Polin.

“Jolo ro ma helam, atik olo rap mangan hami annon” ninna si Kartini lambok mambege hata ni Inongna na so sai marjogal be ingkon sian ibana manjalo haputusan laho pasali Inongna i.
>>>>>>>>>>>marudut>>>>>>>>>>

Masukkan email anda untuk berlangganan artikel kami