HAMPUNG TOGI - SOTUNG MAREME NA BIBI ??.



Panurat: Tansiswo Siagian.

Pukul sampulu manogot i nunga ro angka tanoan ni si Togi sian toke bosar partigatiga napu na di Onan Balga Kecamatan nasida i, hape si Togi nunga tu balian ai hirim rohana dung tonga ari hian do ro barang i. Sian Toke Bosar halak Sina do si Togi manuhor angka napu dohot angka na ringkot tu pangulaan laho gadison nasida muse. Olo do muse toke i manaruhon barang pinangido ni si Togi ala manigor godang si Togi sahali manuhor, gariada olo do tokke i mangorui arga tu si Togi ala ndang hea si Togi manadingkon utang agia pe saotik tu tokkena i.

Lobi satonga jom dipatuat barang i tu kios partigatigaan ni Togi i, pola deba laos songon i dipeakhon nasida di emper jabu induk i ala so siat di kios tagelleng inganan partigatigaan nasida i.

Ala ansung dipeakhon songon i di emper ni jabu i, dang tartaon Ompu Pangadean boru rohana so mampardungketdungketi pasisihon deba napu i unang apala sonson di jolo ni labalaba jabu i unang haduk ingkon langkaan molo naeng bongot tu jabu..

Manigor ihut ro muse si Kartini mangangkupi simatuana I, asa tumibu rohana sidung jala unang maloja hu simatuana I sahalaksa manghandit napu i.

“Ehhh ehh, so tung dihandit ho i. Paida ma disi samban asalma nunga boi mamolus tu jabu” ninna Ompu Pangadean boru ala naeng diangkupi si Kartini ibana paorot Napu par lima pulu kiloan.
“Toe ma Inong asa huangkupi ho, asa humatop sidung”

“Bah.Dang naung mardenggan pamatang ho poang? Jaga do ho tu dirim ai mangulahi retes do pardangingonmu saonari songon na mangindangisara. So tung mareme na bibi ho kedan. Paida ma disi, dang rumingkot Napumi sian hahipasonmu poang” ninna Ompu Pangadean boru huhut manait tangan ni si Kartini.

Longang si Kartini panait ni simatuana i di ibana, huhut laos so diantusi ibana muse angka hata aha dipandok simatuana i tu ibana. “Retes, mangindangisara, mareme na bibi” tung so dapot do diantuasi si Kartini hata ni Simatuana i.

“Ai aha do didok ho Inong gabe ingkon taitonmu tanganki?”

“Gale do pamatangmu nuaeng ala na mardenggan pamatang i ho, tarlobi poang pahumai dope ho songon on mardenggan pamatang. Songon pardaging naimbaru do ho nuaeng gabe poso hian mangulakhon pardagingonmu so tung maon mareme na bibi ho kedan”

“Mareme na bibi?”

“Olo. Mareme na bibi manang keguguran ninna hata Malai. Rumingkot do hasehatonmi poang unang paruntungan sisaotik on”

Dang malo mandok dia be si Kartini panghabit ni simatuana i di ibana, mansai lambok panghilalaanna hata ni simatuana i mangondihon ibana.

“Toe, mardahan ma ho. Unang ro annon simatuam doli sian lapo dang masak dope indahan. Ahu pe manjaga tigatigamon” ninna Ompu Pangadean boru.

“Diboto Inong do annon molo adong manuhor?”

“Dang huantusi i. Molo adong annon na manuhor ginora ho mangalehon. Toe, langkahon ma mardahan, alai tae ho molo tu sumur so tung tarsulandit ho”

Dang sadia leleng nunga ro si Togi sian balian songon na gopogopo mardalan dung diida ibana purguk Napu di emper jabu nasida i. Ai dang hirim rohana naung ditaruhon tongke i barang i. Gabe dihumalaputi ibana padimpos inganan ni napu i, asa unang manungkoti dalan laho tu jabu.

“Boasa songon i godangna sahali manuhor bahenonmu, nunga dibotoho dang siat di kiosmu etengeteng on” ninna Inongna i manihai si Togi.

“Sogot nian manigor suda do on lobi satonga ai nunga partonaan ni jolma i on godang”

“Dipautangkon ho muse ma ra ate?”

“Bah i do Inong, ia gari manjetor pe manggarar gotilon do, lam ma napu songon on tong do marbaga gararon gotilon do. Boha ma bahenon nunga songon i masa nuaeng sude marbaga pautanghon do partigatiga sude. Molo so ni pautanghon so langku i” ninna si Togi.

“So tung maarga hu dibahen ho tung pe manggaran gotilon gararonna hepengna. Unang songon na debaan pola sahat tu naeng marlompit dua dibahen. Alai huhut ni i ma jolo, boha do nantoari didok simatuam tu ho?”

“Dang adong mandok agia aha nasida Inong"

“Nanaeng sungkunonku boha do parborhat ni Simatuarta?”

“Borhat ninna nasida  marpesawat sian Medan"

“Alai ninna Parumaen nangkin naeng marsali ninna simatuam tu ho, alai ndang adong dope dilehon hamu punna”

“Daong dope Inong, toho do pandok ni parumaenmi"

“Bah, nunga sala ho disi, ia haru halahan dipasalihon ho mamangke napum. Hape Simatuam naeng marnida Laem tu Jakarta laos so olo ho patuk nasida?. Pangalobian do ho so olo ho pasalihon Simatuam, ai dapot rohangku do boha hansit ni Simatuam na paborhat parsingkola dua kuliah dua SMA jala sude ingkon dao marsingkola. Sahali opat ompunge singkola jala ingkon manggarar balanjo ganup bulan, asing di uang singkola dohot uang na asing dope, na ngernger roham pasudaon ni na opat i? Hape simatuam holan marbaga sian gogo ni hauma do”

“Nilean pe Inong

“Molo ingkon tong do lehononmu boasa marpainte jolo. Ia nantoari manigor hatahon i pola ingkon busiasaon so tarpodom simatuam saborngin on holan paima haputusan sian hamu” ninna Ompu Pangadean mansai muruk mandok hatana tu si Togi.

“Hulangkahon pe annon dung sidung mangan tu jabu ni Simatuangku”

“Hulangkahon nimmu dung saonari. Ianggo hatam mandok hulahula do silehon pasupasu. Sai managam do ho ganup tongkin Hulahula mangalehon pasupasu, ia hape holan marsali do hulahulam marmaol ho. Ai so hea dope ho digabusi nasida. Pauba i rohami, unang bahen busisaon halak tarontohon ala so dilehon ho haputusan hape nunga manghirim nasida” ninna Ompu Pangadean boru songon na marungutungut.

“So tung holan pasalihon ho, ingkon lehononmu do mangurupi Simatuami manang sadia pe godangna, unang molo laho mabuk, manuhor tuak dohot bir painum halak gok suda hepengmu. Ai boha pe simatuam do i, hulahulam silehon pasupasu di hamu. Muse si Polin nama haduan donganmu marsitungkolan, jai ringkot do marsitomuan roha ho tu sude laemi. Dang hatingkian haduan gabe ingkon ho na mangido pangurupion tu angka laemi. Unang leas roham” ninna Ompu Pangdean boru manguduti hatana.

“Olo, olo…nunga sae be i Inong. Mohop pinggolhu holan na murukmuruk do ho” ninna si Togi.

“Jai pandokmu dang muruhan molo so adong roham?. Neang do roham huroha marnida Laemi. Ai dang simatuami be siidaonmu? Angka laemi nama si idaonmu dohot siaduonmu rohana” ninna Ompu Pangadean, “unang ala adong saonari hepengmu leas roham tu jolma tarlobi tu laem tungganemi, dang hatingkian marhusor na masa. Hatop langkahon annon tu jabu ni simatuaman” ninna Ompu Pangadean boru manguduti.

“Olo Inong, laho pe ahu annon, holan ahu do ungutanmu” ninna si Togi mareoteot manghatai huhut manadingkon Inongna i.
>>>>>marudur>>>>>>>

Masukkan email anda untuk berlangganan artikel kami