HAMPUNG TOGI - PARSONDUK BOLON




Panurat: Tansiswo Siagian.
PARSONDUK BOLON.
Dung gok sabulan dung marhasohotan si Togi dohot si Kartini, sajabu dope nasida dohot Ompu si Pangadean. Nunga nian sai dijujui natorasna asa manjae nasida, alai sai manjua do si Togi .
“Bah, ai mangoli pe ahu asa adong do parumaenmon donganku laho mangurus hamu, hape manigor didok hamu ahu laho manjae” ninna si Togi tu natorasna.
Si Kartini pe alo do rohana manigor manjae tarlumobi marningot simatuana doli nunga jotjot tompu marsahit. Muse so bahen ala remeng ni simatuana manang holit ni simatuana tu ibana laho sipasidingonna, nda dohonon lambok ma tahe Ompu Pangadean jala sabar do ibana mangajari parumaenna i.
Ai na tubu do biarna so tung menek roha ni parumaenna songon na maisolat panghilalaanna di jabuna i, i do asa dijujui Ompu Pangadean nasida manjae. Jala asa manigor situtung hudonna be jala silugahon parsaripeonna be.
“Daong Inong, rap ma jolo hita sajabu asa ajari jolo ahu. Ai bajar dope ahu, godang dope na so huantusi taringot mangula, adat dohot mangadopi parrohaon ni anakmon. Asa huantusi jolo gabe Ina na denggan” ninna si Kartini.
Saut do ndang manigor manjae si Togi, jala sapangalompaan do nasida di jabu i. Ndang songon angka na imbaru sohot, manigor manjae humatop rohana. Naeng “berdikari”, on ma hatana, hape na tubu do biarna ndang boi dos rohana dohot simatuana ai ndang olo rohana marsiajar tu simatuana.
Na deba sipata hira na marralokalok paruamen dohot simatua boru manggulut roha ni amantanna, ala ni ma sai gira humatop manjae rohana asa boi roharohana sambing mangaturhon sude parsaripeonna.
Dipungka si Togi do niolina i martigatiga Napu dohot haporluan ni pangulaan isarani rasun, pupuk, dohot na asing dijabu nasida i songon halilianan ni si Kartini unang sai longong molo holan mangalompa dohot manganturehon simatuana i ibana.
Las roha ni Natorasna marnida si Togi tarlumobi parumaenna i, ai dang dihirim ibana na olo nasida rap sajabu. Domu do muse basar ni si Kartini tu simatuana boru jala sai marpanungkun hatiha adong na so ni antusanna tarlumobi taringot tu angka pardalan ni usaha ni si Togi.
“Inong, boha do roham didok anakmu na bodari ahu nama sude maniop pardalan ni jetor, horbo dohot sude ulaulana, songon i tigatiga on sude. Dia ma huantusi i, muse lomos do ahu, so tung annon sala ahu” ninna si Kartini tu Simatuana boru.
“Nunga denggan i poang. Muse ise be tuganon ni si Togi ia so ho, ingkon parsiajaranmu do mulai saonari” ninna Simatuana boru lambok.
Na mambahen si Kartini tarontohon na gabe ibana i do didok si Togi, mangatur parhepengon di jabu nasida i, gabe songon na manangannangan simatuana rohana molo ibana sitiop puro parhepengon tu balanjo dohot haporluan ni Simatuana.
Ianggo si Togi holan na mangula tu balian i nama rohana, naeng polin rohana si Kartini manjama angka usahana i. Songon i nang simatuana boru ndada hea be mangantoi taringot tu parbalanjoon nasida siganup ari, gariada nunga dipasahat simatuana i angka puntalan sitabunianna tu si Kartini asa ibana mangaturhon sude.
“Ho nama parsonduk bolon di jabu on, molo hami dohot simatuam doli na manangkarnangkar nama sian hamu. Ho nama sitiop puro, sisuhat sidabuan, sijaga bahulbahul nang parsonduk angka sibagion tu angka na ringkot. Ia tung pe adong ringkot di hami sian ho nama hami mangido” ninna Ompu Pangadean tu si Kartini.
“Sombangku Inong, dang tarulahon ahu i. So tung gabe bonsir hasesega haduan ala so malo ahu mangaturhon i sude” ninna si Kartini patudu biarna.
“Jai roham ise be tuganonnami poang ia so ho, nunga ho ditodo si Togi parsonduk bolonna bah ingkon tuhuhonmu do i. Toe ulahonma, huajari pe ho nanget asalma unang uraura ho mandele molo toho remeng ahu sipata. Bangkona do molo dung matua sai tamba do remengna” ninna Ompu Pangadean boru huhut maniop tangan ni parumaenna i.
Mamungka sian i ma ias roha ni si Kartini manjalo ulaon i sude. Diulahon ibana do i sian bulus nang balga ni rohana manuhuk gabe parsonduk bolon huhut manonduk simatuana i. Dang boi be manjua ibana ala ingkon ibana nama mangulahon i sude, holan ibana nama situganon ni simatuana i, ala angka haha dohot edana dao do sian nasida di pangarantoanna.
Sipata do si Kartini olo maranganangan dao rohana mangaranapi tu balga ni ulaonna manang “tanggungjawabna” nuaeng dung saut tu si Togi. Alai songon pandok ni simatuana i, ndada ise be tuganon nasida, jala i do molo dung gabe tunggane boru ingkon rade do gabe parsonduk bolon, sisuhat sidabuan, siradoti bahulbahul, gabe Ina tiang ni parsaripeon dohot Ina pangintubu tu sinondukna.
Tarlobi ala naung matua i muse simatuana jala nunga manjalo sulangsulang hariapan gabe hira dabu tu si Kartini nama mangaturhon sipatupaon tu paradaton dohot angka haporluan ni simatuana nang parsaripeonna.
Dung tolu bulan didalani ibana tamba pos do rohana mangulahon i ala ndang mansohot simatuana mangajari ibana dohot mangalehon panuturion atik pe sipata olo tubu remeng ni simatuana i.
Dang pola dirohahon si Kartini molo tupa remeng pe simatuana i mangajari ibana asa hati tu parbalanjoon, dohot unang lemba nang mangaturhon ulaula nasida nang tigatigana i.
Si Togi pe ndang mansadi sai mangajari niolina i ganup ari asa hatop mangantusi sude usahana dohot mangaturhon na ringkot di jabu nasida i.
“Pa e, dang tabo huhilala molo holan na di huta do ahu dang hea ahu tu balian lalap holan ho magosa mangula” ninna si Kartini sada tingki tu si Togi.
“Bah, asing hatam. Tung pe so tu balian ho, lumoja do ho sian ahu. Idama ho do mangalompa, paias pahean, paias jabu, manganturehon natuatua i. Manganturehon tigatiga atik pe so sadia dope panuhor, dang hinata on dope tamulai. Songon i patupa pambukuan ni ulaulanta dohot parkarejonta. Holan i pe boi diulahon ho denggan nunga doli” ninna si Togi.
“Alai Pa e, dang tabo panghilalaanku molo so tu balian mandongani ho”
“Jai, tutuponmu ma tigatiga Napu i?. Jala ise be manganturen natuatua naung suda gogo on?. Idama dung denggan diaturhon ho parmanganon nasida na dua tolu bulan on nunga lam sehat huida, tarlumobi among nunga tamba mokmokna. Marsumangat mulak huida bohina” ninna si Togi.
“Alai….”
Dang saut dipasahat si Kartini hatana ala manigor dihaol si Togi ibana mansai gomos. Gabe sip nama si Kartini so malo mandok dia.
“Dang manang dia rohangku tung pe holan ahu tu balian. Holan di jabu pe boi diulahonho nunga tung las rohangku, ai martigatiga do ho nang dijabu atik pe na mandasor dope” ninna si Togi huhut mangapus simanjujung ni niolina i.
>>>>>>>>>>>marudut>>>>>>>>>>>>>>>

Masukkan email anda untuk berlangganan artikel kami