HAMPUNG TOGI - MURUK AMONGNA TU SI TOGI



Panurat: Tansiswo Siagian.

Nunga sai lomos nian roha ni si Togi uju digorahon si Kartini ibana asa rap marsipanganon manogot i, diarahon si Kartini ibana asa rap mardaon pogu nasida manogot i. Dohot muse do Ompu Pangadean doli manggogohon ingkon rap nasida marsipanganon, ujungna dang tarjua si Togi be so rap marsipanganon nasida. Hape ianggo mardaon pogu manogot nda ingkon sai rap nasida na saleleng on.

Gabe tubu biar ni si Togi na laho adong dohonon ni Natorasna hata annon tu ibana ala na mulak bagas ma ra na borngin ibana.

Dang pola piga hata na tubu uju mardaon pogu nasida, songon i nang dung sidung nasida mangan dang adong hata agia aha didok Ompu Pangadean tu si Togi. Hape ianggo rohana nunga sai lomos so tung dohonon ni natorasna hata tu ibana.

“Tu hauma dia do roham sadari on” ninna Ompu Pangadean doli dompak si Togi.

“Hauma na di dolok an Among”

“Nunga na denggan i. Sihol rohangku naeng tu balian asa rap laho jolo hita. Muse adong do di si sopo panisioan molo mohop ari annon”

“Boasa pola dohot Among tu hauma?"

“Sihol rohangku marnida haumanta i poang” ninna Ompu Pangadean doli manggogo ingkon dohot ibana tu hauma.

Laos so dapot do diantusi si Togi boasa ingkon sai manggogo Amongna i dohot tu hauma, dang porsea ibana holan ala na masihol amongna i asa dohot tu balian. Hape ibana pe nian holan laho mangaligi do atik boha do partubu ni sinuan nasida dua minggu na salpu. Alai ala maringkon dohot amongna i ndang tarjuasa be so mamboan amongna i atik pe sai sungkunsungkun di bagas rohana.

Rap hohom do nasida mardalan marsinunuti langkana be, Ompu Pangadean doli di jolo diihuthon si Togi sian pudi. Marsipatulut rohana be nasida na dua rodi na sahat tu sopo di tongani hauma i.

“Toe ligi ma jolo poang, dison pe ahu paima ho” ninna Ompu Pangadean Doli.

Dilangkahon si Togi mangaligi sude parbalohan ni haumana i, diparrohahon ibana aekna dohot boha partubu ni same naung sinuanton nasida dua minggu na salpu. Alai sai manginongi do rohana, aha do nuaeng roha ni amongna i asa ingkon dohot tu hauma? Molo ala ni na mulak borngin na bodari do ibana boasa dang di jabu hatahonon manang muruhan ni natorasna i ibana.

Akhh…aha ma nuaeng asa ingkon dohot tu balian natuatua on, ninna roha ni si Togi marhusori.

“Nunga sidung huroha sude diligi ho?. Boha do partubuna di ida ho?” ninna Ompu Pangadean.

“Hira dosdos do rap rata huida among”

“Antong pahundul ma jolo poang, asa manghatai hita”

Bop, mallobok tarontok ni si Togi. Ai aha nuaeng laho hatahonon ni among on, aha na masai ringkot ingkon di tonga ni hauma on ibana mandok hatana?. Lam tamba busisaon si Togi dung dipaido amongna ibana hundul di sopo i.

“Apala aha do among ingkon tu balian on hatahonommu hatam tu ahu?”

“Asa holan hita padua do manghatai. Boha nunga boi dohononku hatangkon?”

Mangunduk si Togi huhut angka bukbak tarontokna.
“Manjae ma hamu poang, dumenggan nama huhilala songon i”

Ngongong si Togi. Ai aha do nuaeng ujung ni hata ni amongna i. Hohom sambing do ibana jala tungki simanjujungna mamingkiri hata ni Amongna i.

“Dang tarpaidaida ahu poang songon i aeon ni parumaen. So margagan lojana. Mangalompa, paias jabu, manaringka, manjaga tigatigana, mangurus hami dohot Inongmu asing dope mangurus ho. Hape mardenggan pamatang nuaeng parumaen. Huhilala unang maloja hu parumaen tagonanma hamu manjae” ninna Ompu Pangadean.

“Boasa gabe songon i dohonon ni Among, na adong do sala pangalaho ni parumaenmu?”

“Dang adong. Gariada so i nama burju ni nasida. Na gabe asi do rohangku tu nasida ala ni lojana. Songon na bodari poang, nunga borngin sidung manaringka, so boi manigor modom nasida ala manombo sambolithu. Ingkon mangkar muse nasida ala so marnamulak ho, hape mulak pe nunga mabuk tuak jala sai mutauta i di bilutmi. Jai unang maloja hu nasida ala ni hami jala unang hupaidaida hami hansitna diae parumaen i tumagon ma hamu manjae asa holip sian matangku jorbut ni pangalahomi”

Gabe tamba tungki si Togi, lam diantusi ibana hata ni amongna i na manalihi ibana do. Lam bagas dipingkiri ibana hata ni amongna i na murukna do hape tu ibana. Diingot ibana na borngin ingkon mangkar modom si Kartini ala lalap paias utautana, mangalehon ibana minum, mandampoli tangkuhukna. Hape manogot ingkon tibu muse ibana dungo laho mangalompa. Tompu songon na mardosa si Togi tu inantana i.

“Jai, andigan ma hamu manjae poang dohot parumaen?. Jabunta ni inganan ni Amani Parulian i ma jalo mulak asa adong ingananmuna jala asa holang hita unang sai ni bege manang huida bahenonmu marsingkor parumaen i. Humatop ma poang hamu manjae”

Dang taralusi si Togi pandok ni amongna i. Nunga songon na dirusuk dihilala ibana pusupusuna umbege hata ni amongna tu ibana.

“Holan na bodari dope iba mulak borngin dung saut tu parumaenmu?” ninna si Togi mamintori dirina.

“Sahali do na sungka kedan, padua halihon ura nama mangulakhon i”

“Muse holan na karejo di jabu i do parumaenmu so hea ni togihon i mangula tu balian?” nina si Togi gogo soarana mandok tingkosna rohana.

“Bah, ai ho do hape mangula?. Ho do tahe marsuan, manjetor, marbabo, manimporot, mamupuk, gotilon?. Ho do hape marmahan horbom dohot mangulahon sude ulaula ni pasewahonmi?, dang na manggaji halak ho tahe? Nda holan na mangaturhon ho?. Alusi jolo ahu?”

“Holan manguluhon do ahu molo i do Among?”

“Antong boasa dang holan manguluhon bahenonmu parumaen. Gaji ma nian mangalompa, paias dohot manaringka abit, paias jabu, manjaga tigatiga napu muna i, mangurus hami dohot mangurus ho”

Mate maoto si Togi so mandok dia mangalusi hata ni amongna i. Maup ma tahe ala ni na mabuk tuak na borngin ma gabe songon on hata ni amongna i tu ibana mansai posa situtu.

Holan ala ni si Jannus dohot si Monang ma tahe gabe lalap ibana minum tuak di lapo ni Amani Bilklinton na bodari. Tarlobi muse hata ni si Sangkap na mangalesengi mandok gabe dirajai Inantana ibana dung mangoli dohot hata na mandok si Togi dang marngik tu si Kartini.

“Nunga be poang Togi, nunga hutanda be ho. Bulus nama pangkeonmu rok i mulai on, i nama na suman pangkeonmu dung mangoli ho. Tung mabiar do ho huroha tu si Kartini, so gait ma tahe Ama na nirajaan ni Inaina” ninna si Jannus muse ma tung pe margait hatana.

“Dang laho hatobanmu parumaen i asa dioli ho i. Ingkon antusanmu do ho gabe tunggane doli nasida parumaen gabe tunggane boru, ingkon dos do dang boi marimbar. Diantusi ho do tahe lapatan ni tunggane doli manang tunggane boru?” ninna Ompu Pangadean gogo jala mansai tompu gabe mambahen songgot roha ni si Togi
>>>>>>>>>>marudut>>>>>>>>>>>

Masukkan email anda untuk berlangganan artikel kami