HAMPUNG TOGI - MULAK MANOGOT SI TOGI; ALA MABUK



Panurat: Tansiswo Siagian.

Bangkol do nian roha ni Ompu Pangadean boru laho mandungoi parumaenna i ala nunga bagas borngin, hape nunga mareak pukul sampulu borngin nangkin si Kartini sidung manaringka abit. Si Togi pe laos so mulak sian na sogot, ianggo pandokna na laho tu Kantor Camat do adong ninna urusonna, hape sahat tu tonga borngin laos so marna mulak.

Alai, ala ringkotna dituntun Ompu Pangadean do mandungoi parumaenna i tung pe nian dokdok rohana ala tangkas diboto ibana loja ni si Kartini sadarion, mangalompa, manusi abit, paias jabu, majaga tigatiga Napuna, manapu dohot paias jabu, manaringka dope, alai asa adong laho manggorgori tes ala manombo sambolit ni Ompu Pangadean Doli, ujungna didungoi do parumaenna i.

“Kartini….oh Nai Paima, naung modom do ho poang. Ia dungo ma jolo ho asa hodohon jolo aek ” ninna Ompu Pangadean boru manuktuhi bilut ni parumarenna i.

“Aha Inong?, aha na ringkot?” ninna si Kartini dung diungkap ibana bilutna i.

“Ai na so mulak dope si Togi?”

“Daong dope Inong”

“Tu dia ma nuaeng i, laos so dipingkirhon nioli naung mardenggan pamatang”

“Akh, na lalap do ra anakmi Inong dohot donganna di lapo. Muse on dope hea anakmu songon i”

“Nang so i, unang olio sai mulak borngin ibana, somal haduan. Toe ma kedan, hodohon jolo poang aek las, asa pamasuk tu botol, manombo sambolit ni simatuam. Langkahon ma ate, asa hudampoli jolo simanjojakna i ai apala manorusnama patna i” ninna Ompu Pangadean boru.

Dilangkahon si Kartini mamungka api di tataring tung pe nian losok rohana jala sai ditaittait simalolongna naeng modom, alai ala sahit ni simatuana i, ditaonton ibana do ingkon mangalompa aek. Biar rohana muse so tung bait dia annon simatuana i, hape nian nunga sabulan on ndada hea manombo be sambolit ni simatuana i.

Tompu marbahir rohana marningot si Togi, tompu lungun jala busisaon ibana mamingkirhon tunggane dolina i. Tubu lomos ni rohana so tung bait dia amantana asa so hatop mulak tu jabu. Songgot sampak mudarna tubu sungkunsungkun ni rohana; na mahua do nuaeng ibana, aha do nuaeng na masa, so hea ibana songon on nunga tonga borngin laos so mulak. Diapus ibana nanget  siubeonna, dipapos rohana dang na mahua tunggane dolina i.

Diisihon si Kartini aek naung gurak i tu botol, dipandimpos ibana langkopna, dibungkus ibana dohot sitagundal na ias, diboan ibana tu bilut ni simatuana.

Diida ibana simatuana boru sai mandampoli simanjojak ni simatuana doli, alai ianggo simatuana doli nunga sai maniop siubeonna manaon hansitna.

“Inongma mambahen aek las on tu siubeon ni Among i, ahu pe mandampoli simanjojakna i” ninna si Kartini mangalehon aek las na di botol i, ala subang rohana maniop siubeon ni Simatua dolina.
Didampol si Kartini pat ni Simatuana doli i, tutu mansai manorus. Diososhon ibana miak, didampol asa moru nian ngalina i.

“Singkati ma jolo aek las on, nunga ngali muse. Laos boan jolo termos i tuson asa minum jolo simatuamon” ninna Ompu Pangadean boru.

Hatop hinsat si Kartini, dilangkahon ibana dompak pudi, dihojot ibana mangisi botol i sian aek na mohop sian termos. Diboan ibana muse tu bilut ni Simatuana i. Diida ibana nunga humusor simatuana doli, gariada nunga boi gogo soarana manghatai.

“Na so mulak dope si Togi ninna hamu parumaen?” ninna Simatuana doli.

“Mulak nama satongkinna i, na lalap do ra i Among dohot donganna. Ndang mahua i” ninna si Kartini.

“Hujar ajar do tahe baio i. Nunga diboto hurang hipas hamu alai lalap so marna mulak hape nunga tonga borngin” ninna Ompu Pangadean doli mangadu roha ni parumaenna i.

Dang pola sadia lelengna i nunga ummiran panghilalaan ni Ompu Pangadean doli, simanjojakna pe nunga las jala lam minar bohina marsumangot dung ndang sai mamiu be siubeonna. Nunga boi hundul Ompu Pangadean doli huhut minum tes las pinasahat ni si Kartini.

“Modom ma hamu parumaen asa mangulon hamu. Molo ro annon si Togi pasombu hamu songon i di duru so tung diungkap hamu pintu. Asa diboto lapalapa i jolo na mardai. Paida hamu diduru i ibana” ninna Ompu Pangadean doli patudu murukna pangalaho ni si Togi.

Tutu ma tahe, dang sadia leleng peak si Kartini di podomanna nunga dibege ibana adong manuntuk dorpi ni bilutna sian duru. Si Togi, ninna rohana marbahir. Diingot ibana hata ni Simatuana asa unang mangungkap pintu. ;Akh, songon na digetgeti ateatena molo sai di duru amanta hinaholonganna i

Dituktuk si Togi muse nanget sian duru huhut manjouhon si Kartini nanget unang tarbege natorasna roha ni si Togi so tung gabe Inongna mangungkap pintu. Diantusi si Togi do molo gabe Inongna mangungkap pintu annon, buraanna ma ibana.

“Ma e….ungkap jolo pintu” soara ni si Togi nanget.

Habang roha ni si Kartini, ungkaponna , so tung muruk Simatuana. So ungkaponna, akhh so tung ngalian amantana i sai di duru huhut sai diharati rongit. Tompu madetuk rohana, habang panghilalaanna, diapus ibana ateatena, dang pulut rohana leleng sai manuntuhi amantana i di duru.

Hinsat si Kartini sian podomanna, nanget diungkap ibana pintu ni bilut, manat ibana mardalan manjonohi labalaba ni jabu i. Nanget songon na mangelek rohana asa unang mangkuling pintu i tingki diungkap ibana manait sordak ni pintu i.

“Siittttt……” ninna si Kartini huhut mangodothon jarijarina tu bibirna partanda unang marsoara si Togi.
Diida ibana rabatrabat mardalan amantana i, hosana pe bau tuak; ‘Bah na mabuk do huroha ibana’ roha ni si Kartini mangaransang pintu ni jabu i dohot sordak.

Hohom do si Togi bongot tu bilutna diihuthon si Kartini sian pudi. Songon na disampakhon si Togi nama dagingna tu podoman, mordong panghilalaanna ma godanghu minum tuak dohot donganna di Onan Sirpang Tolu.

Dipapeak si Kartini di lambung ni si Togi, mabiar ibana manungkun boasa leleng, boasa mabuk, boasa….boasa…boasa….haholonganna i, so tung annon muruk rimason parhalanguluna i ala nunga tuahon. ‘Sogot ma husungkun tahe’ ninna roha ni si Kartini.

Tompu mutauta si Togi, sabur songon i di ginjang ni podoman i. Hehe si Kartini, dibuat ibana sitagundal, diapusi utauta ni amantana i. Dang dope sidung diapusi ibana, nunga mutauta muse si Togi.

“Hoaakkkkk……” diutahon si Togi muse niinumna i. Bau, mansai songit dianggo si Kartini, alai ditaonton si Kartini do i. Ibana pe nian nunga tung naeng mutauta, alai sai diorom ibana unang dohot ibana muta. Dilului ibana sitagundal, dang adong be, ditait ibana mandar sian atas ni lamari. Diapus ibana lambok bohi ni Amantana i, diapus muse pamangan ni amantana i nanget. Didampol ibana tangkuhuk ni si Togi sian sude bulus ni rohana, asa moru rohana panghilalaan ni amantana I unang sai mutauta.

“Ma e…….” ninna si Togi, alai manigor hatop ditutup si Kartini pamangan ni Amantana i unang mungkap nian soarana maon dibege simatuana. Tubu biar ni si Kartini dungo Simatuana gabe muruhanna annon si Togi, akh….dang tarjalo rohana hona muruhan si Togi.

“Pasipma disi unang dungo annon Inong” ninna si Kartini huhut mangapus bohi ni amantana i.

Ianggo ala loja ni si Kartini huhut naung mangkar modom nunga naeng dipadomom ibana nian asa sumihar dagingna sogot, alai boha bahenonna so manganturen haholongonna i?

>>>>>marudut>>>>>>>

Masukkan email anda untuk berlangganan artikel kami