HAMPUNG TOGI - DANG RO PANTANGAN NI ABITNA



Panurat: Tansiswo Siagian.
DANG RO PANTANGAN NI ABITNA.
Nunga urmun ari mulak si Togi sian balian ala ingkon mangulahon jetor ibana dohot pangurupina mangula hauma ni halak. Alai dung sahat ibana tu jabu mansai songgot rohana marnida niolina i tangis martabuni di bilut podoman nasida. Manungkap si Kartini huhut manuguthon bohina tu bantal sai tangis songon na mongkihongkik.
Ndang dipatontu si Kartini amantana i naung jonok di lambungna, lungun ni rohana ala muruk ni simatua boruna i do sai ngotngot di rohana. Dang tarjalo rohana muruk simatuana boru tu ibana holan ala na hurang hatop ibana na botari i singkop mangalompa. Ndang rohana nian marsangajo songon na lumeleng masak lompalompana alai na mansai gale do pamatangna gabe hurang hinsa ibana.
“Ai boasa sai tangis ho, na muruk do Inong tu ho?” ninna si Togi.
Sai sip do si Kartini dang mangalusi, iluna do lalap maraburan alani lungun ni rohana.
Lalap sai dielek si Togi niolina i asa olo paboahon aha bonsirna gabe sai tangis ibana. Dihaol ibana si Kartini, diumma, diapus simanjujungna dung i dielek, alai lalap do sai manghuntam dang paboahon aha alana gabe sai tangis ibana.
Naeng do nian dipaboa si Kartini tu Amantana i aha bonsirna tangis ibana, alai tubu biarna so tung gabe muruk muse amantana i tu ibana manang gabe gasagasaon Amang Siadopanna i muruk tu Simatuana boru. Akh…, tumagon ma hupasip, i ma roha ni si Kartini.
Nian nunga moru lungun ni rohana dung dihaol si Togi ibana tarlumobi sungkunsungkunna tangkas do habotoan mangampini ibana do roha ni amantana i. Dohot ma ala na matanda hu i pangampinion ni si Togi gabe mabiar ibana paboahon muruk ni simatuana tu ibana, maon ma ampin hu parhalanguluna i tu ibana gabe tubu badana tu Inongna.
Hape na sopamotoan ni si Kartini dung ditadingkon si Togi ibana duru sian bilut nasida i, manigor disuhuni si Togi do Inongna. Biar roha ni si Togi molo dipasip ibana parsalisian ni Inongna i dohot niolina gabe olo haduan tubu bada bolon, tumagon ma rohana tagan boi dope manigor marsipasalpuan roha humatop dipauli ibana.
“Na muruk do Inong tu parumaenmu nangkin, ai tangis ibana dapothu” ninna si Togi.
“Muruk nangkin ahu, ai na henesan niolimi. Nunga nidok asa tumibu mangalompa asa hatop nian Amongmu mardaon pogu. Manombo sahit butuha bolon ni simatuam dang boi tarlambat mangan nunga ningon alai so diingot” ninna Ompu Pangadean boru.
“Bah, na songon i do hape dalanna parumaenmu sai tangis?”
“Boha didok ibana tu ho?. Atik balikbalik alualuna?”
“So olo ibana mangkuling lalap do iluna dipatudu sai manghohom. I do asa hupatangkas tu Inong”
“Jai boha pandokmu, dang boi muruhan niolim i molo hurang denggan ?. Torang dok asa binoto?”
“So dia hudok Inong, alai dang na mangampini parumaenmu ahu. Molo tung pe hurang hibas parumaenmu saonari unang manigor remengi. Ompop ateatem Inong, ai molo so bait dia do mamuhai mardenggan pamatang parumaenmu, jai mangantusi Inong molo songon na henes manang hurang hinsa ibana”
“Bah. Nunga sega tahe. Bah…bah…boasa dang hatop dipaboa ibana. Ai didia ibana, oh tondingki . Naung dapotan nauli do hape parumaenki, amang tiur ni nipingki. Jaga ho disi asa hutopot jolo ibana tu bilutna an, dia pe nimmu nunga tamba las ni rohangku” ninna Ompu Pangadean Boru humalaput manopot si Kartini tu bilutna.
Asa mansai tarsonggot do si Kartini dung dibereng ibana ro simatuana i manopot ibana tu bilutna i huhut mangapus tanganna lambok.
“Boasa dang dipaboa ho tu ahu naung so ro be pantangan ni abitmu jala naung dapotan nauli ho poang. So huboto naung mamuhai mardenggan pamatang ho, patutna do songon na hurang hinsa pamatangmu. Toe poang hinsat ma ho, unang boan tu roham ungutunguthu nangkin ate. Muse so sian mohop ni ateatengku i tu ho, asa ingot do ho nian diulaonmu rohangku” ninna Simatuana lambok huhut jaga ibana mandok hatana: dang patupa tamba hansit ni roha ni parumaenna i alai dang patubu ginjang ni rohana ala pola ditopot ibana parumaenna i mangelek unang sai tangis be ibana.
“Toe, beta ma hehe ho. Asa mardaon pogu hita, nunga male ra Amantaman. Hinsat ma ho asa sonduk indahan ni si Togi an, ndada sai ahu be manonduk indahan ni i nunga adong ho poang” ninna Ompu Pangadean duru sian bilut i dung didida ibana si Kartini hinsat sian podomanna.
Si Kartini pe dang dia be boi tardokna dung ro simatuana i manopot ibana tu bilutna i, tompu mombun lungun ni rohana. Tarlumobi hata ni simatuana na mandok muruk pe ibana ndada na mohop rohana na, alai asa ingot do ibana diulaonna. Jala ndang diboto simatuana naung mamungka mardenggan pamatang ibana.
“Na burju do hape simatuangkon tu ahu. Ahu do na hurang torang paboahon aha na masa tu ahu” ninna roha ni si Kartini huhut manopot simatuana dohot si Togi tu pudi.
Diida si Kartini nunga hundul si Togi dohot Simatuana boru di lage jala di jolo nasida nunga rade angka piring dohot na asing, alai ndang marna disonduk nasida indahan tu piring nasida, ingkon sai paima ibana manondukhon i. Nunga hea nian dihatahon ibana i tu si Togi di jolo ni Simatuana boasa ingkon paimaon nasida ibana asa mardaon pogu, alai hatop do di alusi Simatuana doli tingki i.
“Ai hamu do parumaen nuaeng gabe parsonduk bolon, hamu do mangantusi sidabuan, hamu do nangkin mandabu parbue silompaon, hamu muse do tangkas umboto sai dia godangna i sira ni salean dohot ingkan situtungon na tinuhormuna. Hamu do umboto sadia godangna i isi ni bahubahulmuna manang simpananmuna. Alani ingkon hamu do manonduk, mambagihon, manuhat naung ni lompamuna asa sirsir ris sude dapotan. Sirsir ndang adong na lobi na deba hurang. I do ninna hamu Inang lapatan ni Parsonduk Bolon”
“I do tohona pandok ni Simatuam i. Tung haru tu si Togi on, tung pe ibana gumodang mansari haduan ingkon ho do mangaturhon parbalanjoon huhut paingot ibana asa hati marhepeng, ai ho do sitiop puro. Ho do umbotosa sadiana i sitabunianmu. Malo ma ho mangaturhon i mulai saonari, asa boi sesep nanget paidukiduhonmu marsitabunian, boi pungu i haduan. Ala molo mangasi do Debata ro nama haduan pahompu laho sibalanjoonmuna."
"Songon i ma poang maol ni sada Ina mangarimpun pardalan ni parsaripeonna. Jai, ingkon ho do marroha asa boi pahimpuonmuna sinamot sasaotik gabe bahen bohal ni pahompu i haduan laho marsingkola. Ai ture ni parsaripeon ni sada jolma tung saguru malo ni Inanta do mangaturhon parsaripeonna dohot manguluhon ianakhonna sude. Ia molo dung do so hasea sada Ina godangan sursar ma parsaripeon nang ianakhonna. Alai ia tung pe hurang ture pangalaho dohot parulaon ni Amantana molo hot do Ina i denggan jala hot di batubatuna gabe tiang sihunti bagasna, boi do ture muse ianakhonna” ninna Simatuana boru manguduti.
Ditangihon si Togi dohot si Kartini sude hata i jala dipahusorhusor di rohana: “Martua do ahu hape saut tu parhalangulungkon ai burju simatuaku mangajari dohot maniroi ahu” ninna si Kartini pasahat mauliate ni rohana.
>>>>>>>>>>marudut>>>>>>>>>

Masukkan email anda untuk berlangganan artikel kami