HAMPUNG TOGI - ASING DO HATA MANGIDO, ASING HATA MARSALI


Panurat: Tansiswo Siagian.
Dang sadia lelengna i nunga sahat si Togi tu bagas ni Simatuana dung dipaorot ibana horbona di pudi ni huta i. Dipahundul ibana di karosi dung dijalang ibana Simatuana boru. Hape manigor ihut do Simatuana doli sian pudi ala diida huroha sian lapo ni Amani Bilklinton ingananna hundul ro si Togi manopot bagas nasida.

Humalaput si Togi jongjong manjalang Simatuana doli na ihut sian pudina.

“Sian dia do hamu hela tongkin on” ninna Amani Polin mamuhai panghataion.

“Dung hutarohon nangkin borumuna, husangahon paorot horbo di pudi ni hutaan” ninna si Togi huhut manurdukhon sigaret tu jolo ni simatuana i.

Dang sanga ganjang si Togi marsirarion dohot Simatuana doli ala manigor diarahon si Kartini ibana dompak pudi manigati pangalompaan ni simatuana i.

“Adong na sogot huarsik haruting, atik tung lomo rohamuna hela rap sigati hamuma tu dapur” ninna Nai Polin tu si Togi.

Ditait si Kartini tangan ni si Togi dompak dapur, disigati nasida lompalompa ni simatuana i.

Disaritohon Nai Polin naung mulai mardenggan pamatang boru nasida, dipatorang las ni roha ni si Kartini burju ni Simatuana manganju dohot mangajari boruna i. Dipaadar ibana naung dihatahon rohana laho marsali sian si Kartini laho ongkos nasida tu Jakarta.

Mansai las roha ni Amani Polin umbege hatorangan ni inantana i, balga rohana ala sonang ni roha ni boruna i, jala las rohana burju ni Ompu Pangadean tu boruna i. Tutu ndada hea dibege nasida barita manang hatahata na adong manihai Ompu Pangadean tu parumaenna si Kartini. Tarlumobi ma muse mambege naung mardenggan pamatang boruna i. Uee tahe sai sehat ma borungki, marpahompu ma ahu satongkinna i, ninna roha ni Amani Polin.

“Alai nunga muba si Kartini on, tamba holitna so marngernger. Apala naeng marsali do iba laos so olo do ibana mangalehon, hape ndang na so adong hepengna?” ninna Nai Polin.

“Boha didok hela i?”

“Ingkon sai tu hela i huroha sungkunon?”

“Jai, tu ise do. Ai so na hepeng ni si Kartini i, manang adong hian dipaborhat ho borumi mamboan sinamot tingki muli?. Unang bahen maila borumi, manat ho ai nunga paniaran ni na asing i. Muse tung naung sinari ni si Kartini hepengna i ingkon tu hela i do ho manungkun, asa unang adong masitihaan nasida muse”

“Maila huhilala molo tu Hela i. Ho ma annon manungkun tu hela i”

Tompu hohom nasida dung ro si Togi dohot si Kartini sian pudi manopot nasida rap hundul di tardas ni jabu i. Alai ianggo Nai Polin nunga sai marhusori rohana boha do nuaeng bahenonna manungkun helana i,olo do suraon helana i pasalahon nasida. Tubu biar ni rohana dang olo helana i pasalihon ibana, ala pandok ni jolma i na holit do helana i.

Tuani ma dibuhai si Togi mandok hatana tu simatuana i, asa unang sai hohom nasida songon i.

“Naeng laho hubege sian borumuna hamu tu Jakarta ala naeng wisuda laeniba si Polin"

Hohom duansa simatuana i, gabe bangkol rohana mangalusi sungkunsungkun ni helana i. Dohononna borhat so adong dope hepeng di tangan nasida, dohononna dang laho hape gogo roha nasida ingkon borhat nian.

“Marmotor Bus do hamu manang marpesawat terbang. Alai tagonan ma marpesawat unang maloja hu hamu marbus?. Andigan tahe hamu borhat Inong?” ninna si Togi manguduti sungkunsungkunna.

“So binoto dope tingkosna hela. Naeng marsali do roha jolo tu hamu asa adong ongkos, ai manangkas dang adong hutiop hami nuaeng hepeng lobi sian balanjo marsingkola angka laem na toluna i. Hape ondo pe sae marsuan eme di hita on, maol do nuaeng luluan parsalian. Atik tung boi patuhon muna hami marsali paima ginarar gotilonon” ninna Amani Polin.

“So adong sadia hepeng ditiop borumuna, hape naeng pajongjong inganan partigatigaan ni pupuk hami nian unang sai sonson di jabu pupuk sigadison ni borumuna i” ninna si Togi nanget.

Tungki Nai Polin, diserbeng ibana mangida si Kartini. Dang songon na maruba bohina, gariada tarida do engkel supingna otik songon na manolopi hata ni si Togi.
‘Nunga gabe holit hape si Kartini on dung saut tu si Togi” ninna roha ni Nai Polin.

“Sadia huroha laho salionmuna, atik boi tarpahusor hami dohot borumuna?” ninna si Togi.

Dipatorang Amani Polin sangkap ni nasida naeng marpesawat, dirangrangi nasida hirahira pardalanan dohot balga ni ongkos nang balanjo nasida sian huta nasida dipadomu tu leleng ni nasida di Jakarta. Dohot do si Togi mangarangrangi hira sadia na ringkot ingkon tiopon nasida hepeng tu ongkos nang balanjo nasida di pardalanan.

“Botima i Among, jolo husigati hami jolo dohot borumuna parhepengonnami annon. Marsogot hupaboa pe tu hamu, ai hepeng pe ditiop borumuna nuaeng so sadia” ninna si Togi.

“Unang mabiar hamu, na marsali do hami. So tung rohamu na manedek hami tu hamu, dung gotilon manigor hugarar hami pe. Pos rohamuna” ninna Nai Polin.

“I do tutu. Asing do hata mangido, asing hata ni na marsali. Urani apala borungku hamu so tung dietong hamu na mangido hami, huboto hami do na mandasor dope hamu” ninna Amani Polin.

“So dia didok helam Among. Molo marsali bah marsali ma ingkon gararon do i, molo mangido bah sileanlean ma i. Marsogot ninna helam paboaonna tu hamu, sai sungkup ma hepengnami” ninna si Kartini huhut jongjong manjalang Inongna dohot Amongna laho hobas mulak tu jabuna.

Dang malo mandok dia Nai Polin tu helana i tarlumobi tu si Kartini. Nunga marimbar hape si Kartini, nunga malo mandok hata, nunga tung asing; Dang si Kartini na ujui be hape borungki, ninna rohana.

Hape nangkin di pudi tingki manigati pardahanan ni Inongna si Kartini nunga dos rohana dohot si Togi na laho lehononna marsali natorasna i.

“Alai unang pintor undukhon i saonari Pa e, unang dietong gok hepengta gabe uraura haduan marsali Inong tu hita atik pe so apala sompit parhepengonna. Muse asa arga roha ni Inong haduan hatop manggarar molo hata marsali do hatana” ninna si Kartini tu si Togi.

“Asi do roha nian ingkon marsogot unduhon, alai toe ma nioloan pe hatam”

“Eheee, ingkon songon i do tu Inong on. Ingkon ‘tegas’, unang gale, molo gale do ho bah olo ma dengkedengkean ni hita haduan. Ia haru Among pe suda do didengkedengkei ala sai patalu roha Among. Dang na so holong roha tu nasida, boha rohangku tu Inongku pangintubu. Alai nunga songon parbue ni unte hita tu nasida marbansirbansir, hibul do alai adong gollitna” ninna si Kartini.

“Boha pe ninmu, ingkon lehononta do mangurupi nanggo ongkos pesawat santulak tu nasida. Muse asa alas roha ni Lae si Polin, ai lae i nama haduan donganta marariari. Dang hatingkian muse angka dakdanakta atik lae i do haduan sipatudu dalan tu nasida, sai anggiatma manigor denggan dapot ni lae ulaonna” ninna si Togi lambok mangadu dao tu jolo.

“Ianggo i antong ‘interenmu’ ma i Pa e tu simatuam dang husatosato i” ninna si Kartini.

“Hahahaa, interenku ate dohot simatuangku. Hahahaha” songgot mengkel si Togi huhut manggalmit hurum ni inantana i ala erget dibege hatani ni olina i.

>>>>>>>>>>>>marudut>>>>>>>>>>>>

Masukkan email anda untuk berlangganan artikel kami